जळगाव : राज्याच्या राजकारणात उलथापालथ झाल्यानंतर राष्ट्रवादी आणि भाजपमध्ये आरोप-प्रत्यारोपाच्या फैरी झडत आहेत. त्यातच आता राष्ट्रवादी काँग्रेसचे नेते एकनाथ खडसे (Eknath Khadse) यांनी भाजप नेते चंद्रकांत पाटील (Chandrakant Patil) यांच्यावर जोरदार टीका केलीय.

'पाच, दहा वर्षे कशाला पाहिजे? आताच घ्या ना,' अशा शब्दांत खडसेंनी चंद्रकांत पाटलांवर निशाणा साधलाय. चंद्रकांत पाटील यांनी नुकतेच पाच ते दहा वर्षांनंतर निवृत्ती घेणार असल्याच्या आशयाचं वक्तव्य केलं होतं, यावरून खडसेंनी पाटलांना हा टोला लगावला.

खडसे म्हणाले, 'चंद्रकांत पाटील यांचा पिंड राजकारणी नाही, ते विद्यार्थी परिषदेचे काम करीत होते. त्यांचा राजकारणाशी फारसा संबंध नव्हता. गेल्या काळात पक्षानं त्यांच्यावर मोठ्या जबाबदाऱ्या दिल्या. मात्र, आता पक्षातले वातावरण त्यांना आवडत नसावं, या वातावरणात पुढच्या काळात राजकारण अवघड आहे असे वाटल्याने राजकारणापासून वेगळे होण्याचा विचार त्यांच्या मनात आला असेल, असं त्यांनी स्पष्ट केलं.

काय म्हणाले चंद्रकांत पाटील?

पुण्यातील एसएनडीटी विद्यापीठात चंद्रकांत पाटील यांनी भाषणादरम्यान एक वक्तव्य केलं. पुढील शंभर वर्षांची दृष्टी आपल्याकडं नाही आणि आपल्याला त्यात रसही नाही. कारण, आपल्याला अजून ५-१० वर्ष काम करुन जायचंय, असं पाटील बोलण्याच्या ओघात म्हणाले. परंतु, त्यावरुन चंद्रकांत पाटलांना निवृत्तीचे वेध लागल्याच्या चर्चा रंगल्या आहेत.