चाळीसगाव (जि. जळगाव) : गुरांसाठी ठेवलेला चारा उचलण्यास सांगितल्याच्या कारणावरून एकाने ६० वर्षीय ज्येष्ठाला लाकडी काठीने जबर मारहाण केल्याची घटना मंगळवारी (ता. ७) दुपारी शहरातील छत्रपती शिवाजी नगरात घडली. याप्रकरणी शहर पोलिसांत पाच जणांविरुद्ध गुन्हा दाखल झाला आहे.

शहरातील शिवाजीनगरातील रहिवासी राजेंद्र सखाराम जाधव (वय ६०) हे शेती व्यवसाय करून आपल्या कुटुंबाची गुजराण करतात. मंगळवारी (ता. ७) दुपारी दीडच्या सुमारास राजेंद्र जाधव हे गुरांसाठी मोकळ्या जागेवर ठेवलेला चारा घेण्यासाठी गेले व चारा घेऊन परत येताना संदीप राजू सोनवणे याने ‘आईला चारा उचलण्याबाबत का सांगितला’ असे म्हणत जाधव यांना शिवीगाळ करुन लाकडी दांडा जाधव यांच्या डोक्यात मारला. त्यामुळे डोक्याला गंभीर दुखापत होऊन रक्तस्राव होऊ लागला. अशातच राजू दामू सोनवणे, संगीता राजू सोनवणे (रा. शिवाजीनगर, चाळीसगाव) व बबलू नाना सोनावणे (रा. विजयसिंग राजपूत नगर), गोलू छोटू सोनावणे (रा. घाटरोड, चाळीसगाव) हे घरातून पळत बाहेर आले व त्यांनीही जाधव यांना लाथाबुक्क्यांनी मारहाण करीत जीवे ठार मारण्याची धमकी दिली. जाधव यांच्या कुटुंबीयांनी मध्यस्थी करत त्यांच्या तावडीतून जाधव यांची सुटका केली. जखमी जाधव यांना तातडीने खाजगी दवाखान्यात उपचारार्थ दाखल करण्यात आले असून त्यांच्या प्रकृतीत सुधारणा होत आहे. राजेंद्र जाधव यांच्या या फिर्यादीवरून शहर पोलिसात वरील पाच जणांविरुद्ध गुन्हा दाखल करण्यात आला आहे.