जळगाव : ओमिक्रॉनचा (Omicron) वाढता धोका लक्षात घेत जळगाव (Jalgaon) शहरातील गर्दीला प्रतिबंध करण्यात येणार आहे, यासाठी मॉल, दुकाने, मंगल कार्यालयात ५० टक्के उपस्थितीची क्षमता ठरवून देण्यात आली आहे. या नियमाचे उल्लंघन करण्याऱ्याविरूध्द कारवाईसाठी जळगाव महापालिकेतर्फे चार पथके तैनात करण्यात आली आहेत.

जळगाव महापालिकेच्या उपायुक्तातर्फे आदेश जारी करण्यात आले आहेत, यात त्यांनी म्हटले आहे, की जिल्हाधिकारी यांनी आपत्ती व्यवस्थापन कायदा २००५ तसेच साथरोग, कोरोना प्रतिबंधक कायदा १८९७ अन्वये शहरातील व्यवसायासाठी काही नियम व अटीच्या अधीन राहून व्यवसाय करण्यास परवानगी देण्यात आली आहे, शासन नियमाचे पालन करण्यासंदर्भात अटी व नियम लागू करण्यात आले आहेत. या नियमानुसार शहरातील मॉल, आस्थापना, सिनेमागृह, लग्न समारंभ,दुकाने यांना ५० टक्के क्षमतेने सुरू करण्यास परवानगी असेल. या आदेशाचे उल्लंघन करणाऱ्यांवर भारतीय दंड संहिता १८६०(४५) चे कलम १८८,आपत्ती कलम ५१ते ६० व फौजदारी संहिता १९७३ मधील तरतुदीनुसार दंडास प्राप्त असतील.

महापालिकेची चार पथके तैनात

जळगाव महापालिकेतर्फे नियमांची अंमलबजावणी करण्यासाठी कर्मचाऱ्यांची चार पथके तैनात करण्यात आली आहेत. एका पथकात तब्बल आठ कर्मचारी नियुक्त करण्यात आली आहेत. हे पथके शहरात फिरून कोरोना प्रतिबंधक नियमांचे उल्लंघन करणाऱ्यावर कडक कारवाई करणार आहेत. नियमांचे उल्लंघन करणाऱ्या नागरिकावर दंडात्मक कारवाई तसेच दुकाने सील करण्याची कारवाईसुध्द करण्यात येणार आहे.