Jalgaon Bribe Crime : तक्रारदार व त्याचे नातेवाईक यांना अटक करू नये व चार्जशीट लवकर दाखल करावी, यासाठी आठ हजारांची लाच स्वीकारताना पारोळा पोलिस ठाण्याचे उपनिरीक्षक जयवंत प्रल्हाद पाटील यांना आज सापळा रचून अटक करण्यात आली आहे.

धुळे तालुक्यातील अंचाळे येथील ४२ वर्षीय तक्रारदारासह त्यांच्या नातेवाइकांवर पारोळा पोलिस ठाणे येथे गुन्हा दाखल करण्यात आला आहे. (Parola police station sub inspector arrested in bribe crime news)

या गुन्ह्यात तक्रारदार व त्यांच्या नातेवाइकांना अटक न करण्यासाठी, तसेच न्यायालयात दोषारोपपत्र लवकरात लवकर पाठविण्यासाठी यातील तक्रारदार यांच्याकडे पोलिस उपनिरीक्षक जयवंत पाटील यांनी ३० हजार रुपयांची मागणी केली.

याअगोदर २० हजार रुपये घेतले व उर्वरित दहा हजार रुपये नंतर घेऊन या, असे सांगितले. त्यानंतर मंगळवारी (ता.१२) उपनिरीक्षक जयवंत पाटील यांनी पंचासमक्ष दहा हजारांची मागणी करून तडजोडअंती आठ हजार स्वतः स्वीकारताना त्यांना पकडण्यात आले आहे.

हेही वाचा : Credit Card फसवणूक....काय घ्याल काळजी?

ही कारवाई पोलिस उपअधीक्षक सुहास देशमुख, पोलिस निरीक्षक एन. एन. जाधव, अमोल वालझाडे, सहाय्यक फौजदार दिनेशसिंग पाटील, सहाय्यक फौजदार सुरेश पाटील, पोलिस कर्मचारी बाळू मराठे, अमोल सूर्यवंशी, सचिन चाटे, रवींद्र घुगे, शैला धनगर, किशोर महाजन, सुनील वानखेडे, प्रदीप पोळ, राकेश दुसाने, प्रणेश ठाकूर आदींनी केली.