Jalgaon News : पिंपळगाव हरेश्वर (ता. पाचोरा) येथील ४२ वर्षीय अल्पभूधारक शेतकऱ्याने शेतातच झाडाला गळफास घेऊन आत्महत्या केल्याची घटना घडल्याने हळहळ व्यक्त होत आहे.

योगेश वाघे असे आत्महत्या केलेल्या शेतकऱ्याचे नाव असून, ते शेतीकाम करून कुटुंबाचा चरितार्थ चालवत होते. ते मंगळवारी (ता. २०) नेहमीप्रमाणे शेतात गेले. धाकटेगाव शिवारातील गट क्रमांक १२२४ मधील झाडाला गळफास घेऊन त्यांनी आत्महत्या केली.(Pimpalgaon Hareshwar Farmers suicide Jalgaon News)

परिसरातील शेतकऱ्यांना त्यांचा मृतदेह झाडाला लटकलेला दिसला. त्यांना पाचोरा ग्रामीण रुग्णालयात दाखल केले असता डॉक्टरांनी मृत घोषित केले.

पाचोरा पोलिसांनी अकस्मात मृत्यूची नोंद करून हे प्रकरण पिंपळगाव हरेश्वर पोलिसांकडे वर्ग केले.

मृत वाघे यांच्या पश्चात वृद्ध आई, पत्नी, दोन मुले, दोन बहिणी, एक मुलगी असा परिवार असून, त्यांनी आत्महत्येसारखे टोकाचे पाऊल का उचलले असावे? याचा पोलिस शोध घेत आहेत.