Jalgaon News : येथील मेहरूण परिसरात ३६ एकर जागेवर बांधण्यात येणाऱ्या विभागीय क्रीडा संकुलासाठी शनिवारी (ता. ११) ‘प्रकल्प व्यवस्थापन सल्लागार’ म्हणून मुंबई येथील शशी प्रभू अॅण्ड असोसिएट यांची नियुक्ती करण्यात आली आहे.

यामुळे आता क्रीडा संकुलाच्या कामासाठी तांत्रिक सपोर्ट लवकर मिळून संकुलाच्या कामास वेग येईल. ( Project Management Consultant for Divisional Sports Complex in jalgaon news )

आगामी दीड ते दोन वर्षांत हे विभागीय क्रीडा संकुल पूर्ण होऊन सर्वच खेळांसाठी येथे मैदाने उपलब्ध असतील, अशी माहिती जिल्हाधिकारी आयुष प्रसाद यांनी दिली. माजी क्रीडामंत्री गिरीश महाजन यांनी २४४ कोटी ५३ लाखांचा निधी विभागीय क्रीडा संकुलासाठी मंजूर केला आहे. पुणे, मुंबईच्या धर्तीवर हे क्रीडा संकुल असेल.

क्रीडा संकुलासाठी चांगला नकाशा तयार करणे, त्यात सर्व खेळांसाठी, खेळाडूंसाठी आणि प्रेक्षकांसाठी सुविधा असायला हव्यात, यासाठी तीन कंपन्यांनी प्रकल्प व्यवस्थापन सल्लागारपदासाठी अर्ज केले होते. प्रत्येकाला प्रेझेंटेशनसाठी अवधी दिला होता.

पालकमंत्री गुलाबराव पाटील हे विभागीय क्रीडा संकुलाच्या समितीचे अध्यक्ष होते. ज्यांनी १०० कोटी किंवा त्याहून अधिकचे प्रकल्प राबविण्यासाठी क्रीडा विभागाने नामांकित तीन एजन्सींमध्ये कल्पना स्पर्धा पाहिली. प्रकल्प सुधारण्यासाठी त्यांनी अनेक कल्पना दिल्या.

पालकमंत्री पाटील, ग्रामविकासमंत्री महाजन, जिल्हाधिकारी प्रसाद, क्रीडाधिकारी रवींद्र नाईक आदींच्या उपस्थितीत तिन्ही कंपन्यांनी सादरीकरण केले. त्यात शशी प्रभू असोसिएटची निवड करण्यात आली आहे.

प्रसाद यांनी सांगितले, की खेळातून निष्पक्षता, संघ बांधणी, समानता, शिस्त, समावेशन, चिकाटी आणि आदर यांसारखी मूल्ये शिकविता येतात. ज्या प्रदेशांनी खेळांना त्यांच्या संस्कृतीचा आवश्यक भाग बनविले आहे, त्यांनी जलद आर्थिक वाढ, रहिवाशांमध्ये चांगले आरोग्य आणि उच्च आनंद अनुभवला आहे.

‘जळगाव रनर्स ग्रुप’सारख्या नागरिकांच्या चळवळीतून खेळांमध्ये उत्साह वाढत आहे. सॉफ्टबॉलमध्ये भारताचे प्रतिनिधित्व करणाऱ्या खेळाडूंमध्ये सर्वाधिक संख्या जळगावातील आहे. गोव्यात नुकत्याच झालेल्या राष्ट्रीय खेळांमध्ये महाराष्ट्राने आतापर्यंतची सर्वाधिक पदके जिंकली आहेत.

पुढील पायरी

क्रीडा संकुल उभारण्यासाठी स्थापत्य अभियांत्रिकी, स्ट्रक्चरल, इलेक्ट्रिकल आणि पाणीपुरवठा डिझाइनकरिता तांत्रिक मंजुरीसाठी तपशीलवार अंदाज सार्वजनिक बांधकाम विभागांना सादर केला जाईल.

प्रशासकीय मान्यता, अर्थसंकल्पीय अनुदानाची मागणी आणि तीन टप्प्यांत निधी वितरित करण्यासाठी तांत्रिक मान्यता क्रीडा विभागाकडे सादर केली जाईल. आंतरराष्ट्रीय निविदा काढली जाईल.

रणजी आणि महाराष्ट्र प्रीमियर लीगचे सामने

क्रीडा सुविधा जळगावमध्ये आर्थिक उपक्रमांचे केंद्र बनणार आहे. खानदेशातील युवा खेळाडूंना भारताचे प्रतिनिधित्व करण्यासाठी ते समर्थन देईल. हे महिला खेळाडूंना आणि दिव्यांग खेळाडूंनाही सपोर्ट करेल. यामुळे जळगावला क्रिकेट स्टेडियम मिळेल. ज्यात रणजी आणि महाराष्ट्र प्रीमियर लीगचे सामने होऊ शकतील.