यावल (जि. जळगाव) : तालुक्यातील किनगाव येथे अंगणवाडीत जाणाऱ्या लहान मुलींचे भांडण झाले. त्यातून मोठ्यांमध्ये वाद झाला. या वादात संतप्त मुलीच्या आईने चुलत दीर, पतीसह इतरांना माहेरील लोकांसह तृतीयपंथीना सोबत घेत मारहाण केली. या प्रकरणी येथील पोलिसात दंगलीसह विविध कलमान्वये गुन्हा दाखल करण्यात आला आहे.

किनगाव (ता. यावल) येथील भूषण शिवाजी साळुंखे यांनी दिलेल्या फिर्यादीनुसार त्यांच्या चुलत भावाच्या मुलीने अंगणवाडीमध्ये त्यांच्या मुलीस मारहाण केली. याचा जाब विचारण्यासाठी त्याची आई मुलीच्या आईकडे गेली. तेव्हा बालिकेची आई मोना संदीप साळुंके हिने साळुंके यांच्या आईला शिवीगाळ केली व वाद वाढला. या वादात मोना हिचे पती संदीप साळुंके यांनी देखील पत्नी मोना हिला कानशिलात मारली. याचा राग येत मोना संदीप साळुंखे ही जळगाव माहेरी निघून गेली. जळगाव येथील आयोध्यानगरातील तिचे वडील बाबुराव मेढे, भाऊ संजय बाबुराव मेढे, सुनीता बाबुराव मेढे, गणेश बापूराव मेढे व जळगावातील चार तृतीयपंथी असे किनगाव येथे आले व त्यांनी फिर्यादी भूषण साळुंके, मोना हिचे पती संदीप साळुंखे, अर्चना साळुंके यांना मारहाण केली. यामध्ये अर्चना साळुंके तिला उजव्या डोळ्याच्या भुवईवर दुखापत झाली. या मारहाणीसह आलेल्या सर्वांनी भूषण साळुंके यांच्या घराची नासधूस केली. तर भांडण वाढत असल्याचे पाहून त्याच भागातील अक्षय बापू साळुंखे, अभिजित किरण साळुंके, योगेश साळवे, विशाल शिवाजी साळुंके यांनी तेथे येऊन भांडण थांबविले व जखमींना यावल ग्रामीणमध्ये आणून त्यांच्यावर वैद्यकीय उपचार केले. वरील फिर्यादीनुसार लहान मुलींच्या भांडणाचा वाद वाढत मोना साळुंके, तिचे वडील बाबुराव मेढे, भाऊ संजय मेढे, सुनीता मेढे, गणेश मेढे व जळगावातील चार तृतीयपंथी यांनी लाठ्याकाठ्या घेऊन फिर्यादी व त्यांच्या पत्नीला मारहाण करून गंभीर जखमी केले व घरातील तोडफोड केली म्हणून दंगलीसह विविध कलमान्वये गुन्हा दाखल करण्यात आला आहे. सहाय्यक फौजदार अजिज शेख, हवालदार नरेंद्र बागुले तपास करीत आहेत.