Jalgaon Crime News : जिल्ह्यात वाळूउपसा बंद आहे. यामुळे वाळूमाफियांची गैरसोय झाली आहे. तरीही काही वाळूमाफियांनी नदीकाठच्या काटेरी झाडाझुडपांत अवैध वाळूसाठे करून लपविले आहेत. (Raids on illegal sand deposits in village Bambhori Savkheda jalgaon crime news)

हे साठे जप्त करण्याचा सपाटा महसूल विभागाने सुरू केला आहे. शनिवारी (ता. ८) व रविवारी (ता. ९) रात्री सावखेडा, बांभोरी, खेडी येथे अपर जिल्हाधिकारी प्रवीण महाजन यांच्यासह महसूल पथकाने साठे जप्त केले. जिल्हाधिकारी अमन मित्तल यांच्या मार्गदर्शनाखाली ही कारवाई करण्यात आली.

खेडी परिसरात शनिवारी रात्री आठ ते नऊच्या सुमारास अपर जिल्हाधिकारी महाजन यांनी नदीकाठच्या परिसरात वाळूसाठा शोधमोहीम राबविली. त्यात ५० ते ६० ब्रास वाळू आढळून आली. रविवारी दुपारनंतर सावखेडा परिसरात अशीच शोधमोहीम राबविली.

हेही वाचा : Credit Card फसवणूक....काय घ्याल काळजी?

त्यात १४० ब्रास वाळू आढळली. बांभोरी येथेही मोहीम राबवून ५०-६० ब्रास वाळू जप्त केली. अपर जिल्हाधिकारी महाजन यांच्यासोबत तहसीलदार नामदेव पाटील, नायब तहसीलदार राहुल वाघ, धरणगावचे तहसीलदार, महसूलची टीम सोबत होती.

जिल्हाधिकारी कार्यालयात साठा जमा

जिल्हा प्रशासनाच्या प्रशासकीय इमारतीत अवैध जप्त केलेला वाळूसाठा जमा करून ठेवला आहे. त्याठिकाणी शंभरापेक्षा अधिक डंपर, ट्रॅक्टर, ट्रकही आहेत. यामुळे प्रशासकीय इमारतीत आता जागा कमी आहे. यामुळे जिल्हाधिकारी कार्यालयामागील जेलच्या बाजूला असलेल्या मोकळ्या जागेत आता जप्त केलेला वाळूसाठा जमा करण्यात आला आहे.