Ramdas Athawale News : देशातील २६ विरोधी पक्षांची बैठक मुंबईत होत आहे, त्यांचे मुंबईत स्वागत आहे, त्यांनी समुद्र पाहावा आणि आपला पंतप्रधानपदाचा उमेदवारही ठरवावा, तो त्यांचा अधिकार आहे.

विरोधकांना एकत्र येऊन विरोध करण्याचा अधिकार आहे, त्यांनी जास्तीत जास्त विरोधी पक्षांना एकत्र करून आपली आघाडी वाढवावी व पंतप्रधान नरेंद्र मोदी यांना विरोध करावा. (ramdas athawale statement on narendra modi jalgaon news)

मात्र २०२४ मध्ये पुन्हा मोदीच सत्तेवर येणार आहेत, असे मत केंद्रीय सामाजिक न्यायमंत्री व आरपीआय गटाचे नेते रामदास आठवले यांनी व्यक्त केले. जळगाव येथे ते पत्रकारांशी बोलत होते.

श्री. आठवले गुरुवारी (ता. ३१) जिल्ह्याच्या दौऱ्यावर आहेत. पत्रकारांशी संवाद साधताना ते म्हणाले, की आमचा रिपब्लिकन पक्षही नरेंद्र मोदी यांच्या पाठीशी खंबीरपणे उभा आहे. मुंबईत डॉ. बाबासाहेब आंबेडकर यांचे भव्य स्मारक पंतप्रधान मोदी इंदू मिलच्या जागेत उभे करीत आहेत. मुंबईत बाबासाहेब आंबेडकरांचा पुतळाही उभारला जात आहे.

हेही वाचा : Credit Card फसवणूक....काय घ्याल काळजी?

देवेंद्र फडणवीस यांना अधिकार देऊन मंत्रिपदात अजित पवार यांचे पंख कापले जात असल्याच्या चर्चेबाबत ते म्हणाले, की फडणवीस एकटे काही सर्वच अधिकार घेणार नाहीत तसेच मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या सल्ल्याने अजित पवार काम करतील.

आगामी जिल्हा परिषद, पंचायत समिती, पालिका व महापालिका निवडणूका महायुतीच्या माध्यमातूनच लढविल्या जातील. आगामी काळात मंत्रिमंडळाचा विस्तार करावा यासाठी आपण मुख्यमंत्री एकनाथ शिंदे, उपमुख्यमंत्री फडणवीस व अजित पवार यांच्याशी बोलणार आहोत.

तसेच या विस्तारित मंत्रिमंडळात आमच्या पक्षालाही एक मंत्रिपद द्यावे, अशीही मागणी करणार आहोत. तसेच जिल्हा नियोजन मंडळ व इतर शासकीय समित्यांवर पक्षाचा प्रतिनिधी घेण्यात यावा, अशी आपली मागणी राहणार असल्याचे आठवले यांनी स्पष्ट केले.