जळगाव : खरीप हंगामाकरिता अधिसूचित क्षेत्रातील अधिसूचित पिकांसाठी योजना राबविण्यात येत आहे. या योजनेंतर्गत नैसर्गिक स्थानिक आपत्तीमुळे व काढणी पश्चात नुकसान झाल्यास शेतकऱ्यांनी ७२ तासांच्या आत कळवावे, असे आवाहन जिल्हाधिकारी अमन मित्तल यांनी केले.

‘प्रधानमंत्री पीकविमा योजना-२०२२-२३’ खरीप हंगामाकरिता अधिसूचित क्षेत्रातील अधिसूचित पिकांसाठी एआयसी विमा कंपनीमार्फत योजना राबविण्यात येत आहे.

या योजनेंतर्गत काढणी पश्चात नुकसान या बाबीकरिता ज्या पिकांची कापणी/काढणीनंतर सुकवणीसाठी शेतात पसरवून ठेवलेल्या अधिसूचित पिकांचे काढणीनंतर दोन आठवड्यांच्या आत (१४ दिवस) अतिपावसामुळे नुकसान झाल्यास वैयक्तिक स्तरावर पंचनामे करून व निकषांचे अधीन राहून नुकसानभरपाई निश्चित केली जाते.(Report crop damage within 72 hours after harvest Collector Mittal appeal Jalgaon News)

विमा संरक्षित क्षेत्र जलमय झाल्यास, ढगफुटी अथवा वीज कोसळल्यामुळे लागणारी आग किंवा पुराचे पाणी शेतात शिरून, शेत दीर्घकाळ जलमय राहिल्यास या नैसर्गिक स्थानिक आपत्तीमुळे पीक नुकसानग्रस्त झाल्यामुळे अधिसूचित पिकाचे ठराविक क्षेत्रातील नुकसान वैयक्तिक स्तरावर पंचनामे करून निश्चित करण्यात नेईल.

पीकविमाधारक शेतकऱ्यांचे अधिसूचित पिकांचे नुकसान झाल्यास ७२ तासांच्या आत नुकसानीची पूर्वसूचना विमा कंपनीस टोल फ्री क्रमांकाद्वारे, मोबाईल अॅपद्वारे किंवा तालुक्याच्या ठिकाणी विमा कंपनीच्या कार्यालयात/तालुका कृषी अधिकारी कार्यालयात ऑफलाइनद्वारे देणे आवश्यक आहे, असे जिल्हाधिकारी मित्तल यांनी सांगितले.