भडगाव (जि. जळगाव) : येथील छत्रपती संभाजी महाराज सभागृह चाळीसगावचे उपविभागीय अधिकारी लक्ष्मीकांत साताळकर यांच्या अध्यक्षतेखाली प्रभाग निहाय आरक्षणाची सोडत (Reservation of wards draw) आज सकाळी अकराला काढण्यात आली. या सोडतीनंतर ‘कही खुशी कही गम’चे चित्र पहायला मिळाले. (Reservation of wards of Bhadgaon Municipality announced Jalgaon News)

सुरवातीला मुख्याधिकारी रवींद्र लांडे यांनी प्रभाग आरक्षण संदर्भातील माहिती उपस्थितांना दिली. भडगाव शहरातील १२ प्रभागात प्रत्येकी २ याप्रमाणे २४ जागा आहेत. त्यापैकी अनुसूचित जातीकरिता १, अनुसूचित जमातीकरिता २ व व उर्वरित २१ जागा सर्वसाधारण प्रवर्गासाठी उपलब्ध करण्यात आल्या आहेत. प्रभाग १ मध्ये अनुसूचित जमाती महिला व सर्वसाधारण, प्रभाग ११ मध्ये अनुसूचित जाती व सर्वसाधारण महिला, प्रभाग १२ मध्ये अनुसूचित जमाती व सर्वसाधारण महिला असे आरक्षण निघाले असून उर्वरित प्रभाग २ ते १० मध्ये प्रत्येकी एक जागा सर्वसाधारण महिलांसाठी तर दुसरी सर्वसाधारण राहणार आहे. आरक्षण सोडतीची चिठ्ठी टोणगाव जिल्हा परिषदेच्या शाळच्या विद्यार्थिनी हर्षदा वाडेकर व मिताली पाटील यांनी काढल्या. आरक्षण सभेचे कामकाज नगरपरिषद अधीक्षक परमेश्वर तावडे, नितीन पाटील यांनी पार पाडले. सभेसाठी विविध पक्षांचे इच्छूक उमेदवार, पदाधिकारी व कार्यकर्ते उपस्थित होते.