रावेर (जि. जळगाव) : तालुक्यातील नुकसानग्रस्त केळी उत्पादक शेतकऱ्यांना ठिबक सिंचन संचामध्ये २५ टक्के सूट देण्याबाबत श्रीराम इरिगेशन संस्थेचे संचालक तथा उद्योजक श्रीराम पाटील यांनी येथे झालेल्या पत्रकार परिषदेत माहिती दिली.

श्रीराम पाटील म्हणाले, की २०१९ मध्ये अशाच प्रकारे वादळी पावसाच्या तडाख्यामुळे केळी उत्पादक शेतकऱ्यांचे मोठे नुकसान झाले होते. या वेळी आपल्या संस्थेतर्फे अशी सूट देण्यात आली होती. त्यात ४० शेतकऱ्यांनी फायदा घेतला होता. यावेळीही शेतकऱ्यांसाठी हा निर्णय घेण्यात आला आहे. मध्य प्रदेशातील निकषाप्रमाणे शेतकऱ्यांना हेक्टरी दहा हजार रुपये शेत सफाईसाठी मिळावे. तसेच हेक्टरी एक लाख रुपये नुकसान भरपाई मिळावी. गेल्या पाच वर्षांपासून वादळी पावसामुळे शेतकऱ्यांचे नुकसान होत आहे. विमा कंपनी व शासनाकडून मिळणारी नुकसान भरपाई तोडकी आहे. शेतकऱ्यांना योग्य नुकसान भरपाई मिळावी, प्रवीज बिलाबद्दल शेतकऱ्यांच्या तक्रारी आहेत. पाच हॉर्स पावरचा पंप असल्यास वीज मंडळाकडून दहा हॉर्स पॉवरचे बिल आकारणी केली जाते. यासंदर्भात आपण कृषिमंत्र्यांना भेटून समस्या सांगणार असल्याचे श्रीराम पाटील यांनी सांगितले. या वेळी डॉ. सुरेश पाटील, जिल्हा ड्रीप असोसिएशनचे अध्यक्ष सोपान पाटील, राजेंद्र पाटील आदी उपस्थित होते.