जळगाव : ड्युटीवरुन मध्यरात्री घरी जात असताना समोरून येणाऱ्या दोघांनी एकाचा गळा दाबून त्याला लुटल्याची घटना शिवाजीनगरातील ख्रिश्‍चन स्मशानभूमीजवळ घडली. याप्रकरणी दोन जणांविरुद्ध शहर पोलिसात गुन्हा दाखल करण्यात आला आहे.

शहरातील शिवाजीनगर परिसरातील वज्रेश्‍वरी मंदिराजवळ वाल्मीक मोरे (वय ४३) वास्तव्यास आहे. ते एटी महामंडळात लिपिक पदावर नोकरीस असून मध्यरात्री दीड वाजेच्या सुमारास घरी पायी जात होते. यावेळी ख्रिश्‍चन स्मशानभूमीजवळून जात असताना त्यांच्या समोर दोन व्यक्ती आले.

त्यांच्यातील एकाने मोरे यांचा गळा दाबून धरला तर दुसऱ्याने मागून हात घट्ट पकडून ठेवले. यावेळी त्यातील एकाने मोरे यांच्या खिशातील दहा हजार रुपयांचा मोबाईल व पाचशे रुपये रोख असे काढून घेत पसार झाले. याप्रकरणी रविवारी (ता. ५) वाल्मीक मोरे यांनी शहर पोलिसात धाव घेत तक्रार दिली. त्यानुसार पोलिसात दोन जणांविरुद्ध गुन्हा दाखल करण्यात आला आहे.