जळगाव : शहरातील सुप्रिम कॉलनीत दोन महिन्यांपासून बाकी असलेले घरभाडे मागितल्याचा राग आल्याने भाडेकरुने घरमालकाच्या डोक्यात दगड मारुन दुखापत केल्याची घटना घडली.

सुप्रिम कॉलनी परिसरात सेवालाल चौकात संजय रघुनाथ कोळी (वय ४५) वास्तव्यास आहेत. त्यांचे घर त्यांनी गुणवंत विठोबा कोळी यास भाडेकरारावर दिले आहेत. बुधवारी (ता. १७) सायंकाळी संजय रघुनाथ कोळी यांनी दोन महिन्यांचे घरभाडे बाकी असून ते घरभाडे द्यावे म्हणून गुणवंत कोळी याच्याकडे तगादा लावला. त्याचा राग आल्याने गुणवंत कोळी याने दारूच्या नशेत शिवीगाळ तसेच दमदाटी करत संजय कोळी यांच्या डोक्यात दगड मारुन दुखापत केली. जखमी संजय कोळी यांच्या तक्रारीनुसार गुणवंत कोळी याच्याविरुद्ध एमआयडीसी पोलिसात गुन्हा दाखल करण्यात आला आहे. तपास पोलिस नाईक महेंद्र उदयसिंग पाटील हे करीत आहेत.