जळगाव : येथील गोदावरी अभियांत्रिकी महाविद्यालयातील यंत्र विभागाच्या अंतिम वर्षातील विद्यार्थ्यांनी सायकलीवर चालणारे वॉटर प्युरिफायर बनविले आहे. अभिनीत भावसार, दीपक शुक्ला, मिहीर चौधरी आणि वर्षा पाटील यांनी सायकलच्या पेडलचा वापर करून हे वॉटर प्युरिफायर बनविले आहे. (students of godavari engineering made Bicycle powered water purifier Jalgaon innovation latest marathi news).

सामान्यतः वॉटर प्युरिफायर चालविण्यासाठी विजेचा उपयोग केला जातो. मात्र, काही दुर्गम भागांमध्ये, जिथे वीजपुरवठा पोचू शकत नाही, अशा ठिकाणी हे यंत्र खूप उपयोगी पडू शकते. या प्रकल्पाची आखणी आणि बांधणी करताना विद्यार्थ्यांना प्रा. किशोर महाजन (मार्गदर्शक), तसेच विभागप्रमुख प्रा. तुषार कोळी व प्राचार्य डॉ. विजयकुमार पाटील यांचे मार्गदर्शन लाभले

असे चालते यंत्र

या यंत्रामध्ये पेडलद्वारे मिळणाऱ्या मानवीय ऊर्जेचा उपयोग करून, त्याचे वीज ऊर्जेत रूपांतर केले जाते व ती ऊर्जा बॅटरीमध्ये साठवली जाते. ती संचित ऊर्जेचा गरजेनुसार वापर करून, त्यावर वॉटर प्युरिफायर चालविले जाते.

या वॉटर प्युरिफायरची क्षमता एक मिनिटाला दोन ते तीन लिटर पाणी फिल्टर करण्याएवढी आहे. बॅटरी एक वेळ संपूर्ण चार्ज केल्यावर त्याद्वारे फिल्टर सतत तीन ते चार तास काम करू शकते.