जळगाव : तालुक्यातील तरसोद येथील ४० वर्षीय तरूणाने राहत्या घरात गळफास घेऊन आत्महत्या केली. शुक्रवारी (ता. ८) सकाळी उघडकीला आली आहे. अनिल श्रीराम पाटील असे मृताचे नाव आहे.

अनिल पत्नी आणि दोन मुलींसह वास्तव्याला आहे. शेतात मजुरी करून आपला उदरनिर्वाह करत होता. परिस्थिती हालाखीची असल्याने पती-पत्नी मजुरी करत होते. दोन्ही मुली पारोळा तालुक्यातील खराडी येथे मामाच्या गावाला शिकायला होत्या. त्यामुळे तरसोद येथे घरी दोघे जणच होते. रात्री उशिरा अनिल पाटील व पत्नी सुनीता हे जेवण करून झोपले. मध्यरात्री अनिलने राहत्या घरात दोरीने गळफास घेऊन आत्महत्या केल्याचा प्रकार शुक्रवारी उघडकीस आला. आत्महत्या करण्याचे कारण कळू शकले नाही. याबाबत नशिराबाद पोलिस ठाण्यात अकस्मात मृत्यूची नोंद करण्यात आली आहे.