एरंडोल (जि. जळगाव) : श्रीक्षेत्र पद्मालय येथील पडक्या बसस्थानकाजवळ स्थानिक गुन्हे शाखेच्या पोलिस पथकाने भातखेडे (ता. एरंडोल) येथील २२ वर्षीय युवकास अटक करून त्याच्याकडून सुमारे ५० हजार रुपये किमतीचे दोन कट्टे जप्त केले. श्रीक्षेत्र पद्मामालाय परिसरात गावठ कट्ट्यासह (Pistols) युवक सापडल्यामुळे तालुक्यात खळबळ उडाली आहे. (Suspect carrying pistols arrested in Padmalaya jalgaon Crime news)

जळगाव येथील स्थानिक गुन्हे शाखेचे उपनिरीक्षक अमोल देविदास देवढे यांना पद्मालय येथे एक युवक गावठी कट्ट्यासह फिरत असल्याची गुप्त माहिती मिळाली. उपनिरीक्षक अमोल देवडे यांनी स्थानिक गुन्हे शाखेतील कर्मचारी भगवान पाटील, सुनील दामोदरे, अशरफ शेख, नंदलाल पाटील, राहुल बैसाणे, ईश्वर पाटील यांना याबाबत माहिती दिली. शनिवारी रात्री साडेदहाच्या सुमारास स्थानिक गुन्हे शाखेचे कर्मचारी पद्मालय परिसरात गेले. पद्मालय येथील शासकीय विश्रामगृहाच्या बाजूला असलेल्या अंधारात वाहन लाऊन कर्मचाऱ्यांनी संशयिताचा शोध घेण्यास सुरवात केली. रात्री साडेअकराच्या सुमारास पद्मालय येथील जुन्या बसस्थानकाजवळ अंधारात एक युवक असल्याचे दिसताच गुन्हे शाखेच्या कर्मचाऱ्यांनी त्यास ताब्यात घेतले.

त्याची विचारपूस केली असता त्याने स्वत:चे नाव चेतन गोविंदा पाटील (भदाणे) (रा. भातखेडे, ता. एरंडोल) असल्याचे सांगितले. त्याची झडती घेतली असता त्याच्या कमरेस सुमारे पन्नास हजार रुपये किमतीचे दोन गावठ कट्टे आढळून आले. पोलिसांनी त्यास तत्काळ ताब्यात घेऊन एरंडोल पोलिस स्थानकात आणले. याबाबत भगवान तुकाराम पाटील यांनी दिलेल्या तक्रारीवरून चेतन पाटील यांच्याविरोधात गुन्हा दाखल करण्यात आला असून, पोलिस निरीक्षक ज्ञानेश्वर जाधव यांचे मार्गदर्शनाखाली उपनिरीक्षक शरद बागल तपास करीत आहेत.