जळगाव : शहरातील कोल्हे हिल्स परिसरातून स्थानिक गुन्हे शाखेच्या पथकाने गेल्या वर्षभरापासून फरार ठगबाजास अटक केली आहे. अटकेतील राजकुमार नारायण पाटील (वय ४२) याने पतसंस्थेच्या ठेवीदारांसह ऑनलाइन शिक्षणाच्या नावाखाली जळगाव, धुळे, नंदुरबार व नाशिक जिल्ह्यातील लोकांना फसवले होते.

देवपूर (जि. धुळे) पोलिस ठाण्यात महाराष्ट्र ठेवीदारांच्या हितसंबंध संरक्षण अधिनियमाअंतर्गत दाखल गुन्ह्यात गेल्या वर्षभरापासून राजकुमार पाटील हा भामटा पसार होता. त्याने नंतर ‘एज्युकेशन फॉर यू’ नावाने ऑनलाइन कंपनी उघडून असंख्य नागरिकांची कोट्यवधी रुपयात फसवणूक केली होती. फरार राजकुमार जळगावात आश्रयाला असल्याची गुप्त माहिती मिळाल्यावरून गुन्हे शाखेचे निरीक्षक किरणकुमार बकाले यांच्या पथकातील सहाय्यक निरीक्षक जालिंदर पळे, अमोल देवढे यांच्यासह पोलिस कर्मचारी लक्ष्मण पाटील, किशोर राठोड, रणजित जाधव अशांच्या पथकाने रविवारी (ता. २९) संध्याकाळी ताब्यात घेण्यात आले.