जळगाव : ममुराबाद रोडवरील हॉटेल मितवाचे शटर वाकवून चोरट्यांनी डल्ला मारला. गल्ल्यातील १७ हजारंची रोकडसह सीपीयू चोरून नेल्याचे सीसीटीव्ही (CCTV) कॅमेऱ्यात कैद झाले आहे. ही घटना रविवार (ता. २६) मध्यरात्री घडली. (Thieves robbed Hotel Mitwa jalgaon crime news)

शनिपेठेतील रहिवासी चेतन अनिल वाणी यांची ममुराबाद रोडवरील प्रजापतनगरमध्ये हॉटेल मितवा आहे. रविवारी दहाला नेहमीप्रमाणे हॉटेल बंद झाल्यावर मालक वाणीसह स्टाफ घरी गेला. सोमवारी (ता. २७) सकाळी नऊच्या सुमारास हॉटेल उघडण्यासाठी चेतन वाणी आले असता, त्यांना हॉटेलचे शटर एका बाजूने थोडे उचकवलेल्या अवस्थेत दिसून आले.

त्यांनी शटरचे कुलूप उघडून आत प्रवेश केल्यानंतर त्यांना चिल्लर व चाव्या काऊंटरवर पडलेल्या दिसल्या. त्यांनी गल्ल्याची तपासणी केली असता, १७ हजारांची रोकड व सीपीयू गायब असल्याचे दिसून आले.

हेही वाचा : नोकरदार असाल तर रोखीनंच घ्या कार

डीव्हीआर समजून सीपीयू लंपास

मिळालेल्या माहितीवरून तालुका पोलिसांनी घटनास्थळी पाहणी केली. श्वानपथक व ठसे तज्ज्ञांनी चोरट्यांच्या हाताचे ठसे संकलित केले आहेत. चोरट्याला हॉटेलमध्ये सीसीटीव्हीत आपण चित्रीत झाल्याचे कळताच त्याने काऊंटरवरील बिलिंग संगणकाचा सीपीयू पळविला. मात्र, त्याचे चित्रण डीव्हीआरमध्ये संरक्षित राहिले.

चोरटा सीसीटीव्ही कॅमेऱ्यात कैद

चोरटा मध्यरात्री हातात बॅटरी घेऊन हॉटेलमध्ये शिरला. त्यानंतर त्याने हॉटेलच्या काऊंटरवरील उघड्या दारूच्या बाटलीतून पेग रिचविला. नंतर त्याने काऊंटरचे ड्रॉवर तोडून रोकड घेतली. तो सुमारे १५ ते २० मिनिटे हॉटेलच्या आवारात फिरत होता. त्यानंतर चोरटा दुचाकीने ममुराबादकडे गेल्याचे सीसीटीव्ही कॅमेऱ्यात कैद झाले आहे. पोलिसांनी पूर्ण फुटेज ताब्यात घेतले असून, त्यावरून संशयिताचा शोध सुरू केला आहे.