चाळीसगाव : वाघळी (ता. चाळीसगाव) येथील श्री मुधाई देवीच्या मंदिरातील देवीचे डोळे गेल्या आठ दिवसांपूर्वी चोरीला गेले असल्याची कुजबूज व दबक्या आवाजात चर्चा वाघळी गावात पसरली. याबाबत आमच्या प्रतिनिधीने देवीच्या मंदिराला भेट देऊन प्रत्यक्ष पाहणी केली असता डोळे चोरीला गेल्याच्या घटनेला नाव न सांगण्याच्या अटीवर दुजोरा दिला.

दरम्यान, वाघळी गावाला समक्ष भेट दिल्यानंतर एका ग्रामस्थाची भेट घेतली. त्याने नाव न छापण्याच्या अटीवर माहिती दिली. चोरी झाली आहे हे खरे आहे, मात्र चाळीसगाव येथील ग्रामीण पोलिस ठाण्याचे चार, पाच पोलिस आमच्या गावात आले होते, त्यांनी गावातील पोलिस पाटील यांची व गावातील इतर मान्यवरांची भेट घेतली आणि गावाची बदनामी होऊ नये, म्हणून आजपर्यंत काहीच कारवाई केली नाही.

याबाबत अधिक तपास केला असता, हे मंदिर छत्रपती संभाजीनगर येथील केंद्र सरकारच्या भारतीय पुरातत्त्व सर्वेक्षण मंडळाच्या अखत्यारित आहे. या मंदिरावर एका सुरक्षारक्षकची नियुक्ती केलेली आहे. मात्र तो कधीच येथे येत नाही. त्याने वाघळी गावातील एकाची नियुक्ती केलेली आहे. त्याला तो पगार देतो. तसेच वाघळी गावातील एक पुजारी गेल्या कित्येक वर्षांपासून रोज पूजा करून निघून जातो.

यासंदर्भात येथील ग्रामीण पोलिस ठाण्याचे पोलिस निरीक्षक ज्ञानेश्वर जाधव यांची समक्ष भेट घेण्यासाठी आमचे प्रतिनिधी बुधवारी (ता. २३) भेट घेण्यासाठी गेले असता त्यांची भेट होऊ शकली नाही. मात्र तेथील गोपनीय शाखेच्या पोलिसांनी या घटनेला दुजोरा दिला आहे. आता पोलिस काय कारवाई करतात, याकडे नागरिकांचे लक्ष लागून आहे.