चोपडा : नाशिक येथील विशेष पोलिस महानिरीक्षक यांच्या पथकाला मिळालेल्या गुप्त माहितीनुसार गुरुवारी (ता. २८) रात्री एकच्या सुमारास तालुक्यातील विविध ठिकाणी छापा टाकून पोलिसांनी तीन संशयितांना ताब्यात घेत त्यांच्याकडून सहा बनावट पिस्तुल, २४ जिवंत काडतुसे यासह सुमारे दीड लाखांचा मुद्देमाल जप्त केला आहे. दरम्यान, एक जण पसार झाला आहे.

नाशिक येथील विशेष पोलिस महानिरीक्षक यांच्या पथकाला मिळालेल्या गुप्त माहितीनुसार दोन वेगवेगळ्या भागात छापा टाकून एकूण सहा स्टिलचे गावठी बनावटीचे पिस्तूल व २४ जिवंत काडतूस बाळगणारे संशयित सतनामसिंग जुनैजा, अक्षय महाले, विजय पाटील यांना पोलिसांनी अटक केली असून, हॅप्पी उर्फ प्रवीण शिकलकर हा फरार झाला आहे. या दोन्ही घटनेत सुमारे दीड लाखांचा मुद्देमाल पोलिसांनी ताब्यात घेतला असून, अक्षय महाले, विजय पाटील, हॅप्पी उर्फ प्रवीण शिकलकर यांच्याविरुद्ध चोपडा शहर पोलिस ठाण्यात गुन्हा दाखल करण्यात आला आहे. पोलिस उपनिरीक्षक विनोद पाटील तपास करीत आहेत. तर संशयित सतनामसिंग महारसिंग जुनैजा याच्यावर चोपडा ग्रामीण पोलिस ठाण्यात गुन्हा दाखल करण्यात आला असून, पोलिस उपनिरीक्षक अमरसिंग वसावे तपास करीत आहेत.

...अशी केली कारवाई

खाऱ्या पाडाव शिवारात उमर्टी वैजापूर रस्त्यावरील टेकडीजवळ सतनामसिंग महारसिंग जुनैजा (वय २२, रा. उमर्टी, जि. बडवाणी) याच्याकडून ८२ हजार ५०० रुपये किमतीचे तीन स्टिलचे गावठी बनावटीचे पिस्तूल मॅगझिनसह चौदा जिवंत काडतूस पोलिसांनी हस्तगत केले असून, जुनैजा यास अटक केली आहे. तर दुसऱ्या घटनेत पहाटे चारच्या सुमारास चोपडा - धरणगाव रस्त्यावरील हॉटेल विश्वसमोर ७५ हजार रुपये किमतीचे तीन स्टिलचे गावठी बनावटीचे पिस्तूल व दहा जिवंत काडतूस बाळगणाऱ्या अक्षय महाले (वय २५, रा चोपडा), विजय पाटील (वय ३२, रा. चोपडा) यांना पोलिसांनी अटक केली आहे. हॅप्पी उर्फ प्रवीण शिकलकर (वय ३५) उमर्टी (जि. बडवाणी) हा फरार झाला आहे.