नांद्रा (ता. पाचोरा) : पाचोरा तालुक्यात शनिवारी (ता. १०) शहरासह ग्रामीण भागात मेघगर्जनेसह पावसाने हजेरी लावली. काही ठिकाणी दुर्दैवी घटना देखील घडल्या. नांद्रा येथे रात्रीच्या सुमारास येथे निंबाच्या झाडावर वीज पडल्याने झाडाने भर पावसात पेट घेतला. सुदैवाने मोठा अनर्थ टळला आहे.

नांद्रा येथील डॉ. दीपक सूर्यवंशी यांच्या गट क्रमांक १५९ गावाजवळील पाटचारीजवळ असलेल्या लिंबाच्या झाडावर पाऊस सुरु असताना वीज पडली. त्यामुळे झाडाने भर पावसात पेट घेतला. सुदैवाने जवळपास कोणी नसल्यामुळे अनर्थ टळला. शंभर वर्षांहून अधिक काळापासून असलेल्या या निंबाच्या झाडावर वटवाघूळ पक्ष्यांचे वास्तव्य होते. म्हणून या निंबाच्या झाडाला वटवाघूळचा निंब म्हणून ओळखले जात होते. आता या निंबाच्या झाडावर वीज पडल्याने ते झाड जमिनदोस्त होणार असून, ती जुनी ओळख मिटणार असल्याचे दुःख ग्रामस्थांनी बोलून दाखवले.