एरंडोल (जि. जळगाव) : जवखेडा (ता. एरंडोल) येथे किरकोळ वाद झाल्यामुळे संतप्त झालेल्या पतीने लाकडी दांड्याने बेदम मारहाण केल्यामुळे पत्नीचा मृत्यू झाला. पोलिसांनी संशयित पतीस अटक केली आहे.

बाळू भाया बारेला पत्नी भुरकीबाई बारेला व सहा मुलांसह जवखेडा येथे एका शेतात राहून शेतीकामे करून परिवाराच्या उदरनिर्वाह करीत होते. २ जूनला महिलेचा भाऊ सुरसिंग फुलसिंग बारेला यास सकाळी सातच्या सुमारास कैलास बारेला यांनी मोबाईलवरून तुमची बहीण भुरकीबाई बारेला (वय ३०) हिचा मृत्यू झाला असून, मेव्हणे बाळू बारेला मृतदेह घेऊन मूळगाव झापडीमल्ली (ता. वरला, जि. बडवाणी) येथे घेऊन जात असल्याचे सांगितले.

बहीण मृत झाल्याचे समजताच तिची आई व भाऊ झापडीमल्ली येथे गेले. त्या ठिकाणी भुरकीबाई बारेला हिचा मृतदेह गुंड्या सुरसिंग बारेला याच्या घरात ठेवला होता. भाऊ सुरसिंग बारेला यांनी मृतदेह कोणी आणला, याबाबत माहिती विचारली असता, मेहुणा बाळू बारेला व त्यांच्या शेठने गाडीतून मृतदेह आणल्याचे त्याला सांगण्यात आले.

बाळू बारेला मृतदेह टाकून पळून गेला, तर त्याचा शेठ गाडी घेऊन निघून गेल्याचे सांगितले. सायंकाळी कैलास बारेला याने सुरसिंग बारेला यांना सांगितले, की रात्री दहाच्या सुमारास बाळू बारेला पत्नी भुरकीबाई बारेला हिस लाकडाच्या दांड्याने मारहाण करीत होता. त्या वेळी नुचडिया बारेला समजाविण्यासाठी गेले असता, त्यासही मारण्याच्या प्रयत्न केल्याने तो पळून गेला. याबाबत भुरकीबाईचा भाऊ सुरसिंग बारेला यांनी वरला (जि. बडवानी) येथे तक्रार दिली. तेथून ती तक्रार एरंडोल पोलिस ठाण्यात वर्ग झाली आहे. संशयित बाळू बारेला यास पोलिसांनी ताब्यात घेतले आहे. सहाय्यक पोलिस निरीक्षक गणेश आहिरे व त्यांचे सहकारी तपास करीत आहे.