जळगाव : कपाटावर ठेवलेला गरम चहा अंगावर पडल्याने तरुण गंभीररीत्या भाजला गेल्याची घटना बांभोरी येथे घडली. जखमी तरूणाला जिल्हा शासकीय वैद्यकीय महाविद्यालयात उपचारार्थ दाखल करण्यात आले आहे.

जिल्हा वैद्यकीय महाविद्यालयातून प्राप्त माहितीनुसार, पंकज शालिक नन्नवरे (वय २३, रा. बांभोरी) हा तरुण आपल्या कुटुंबीयांसह वास्तव्याला आहे. ट्रॅक्टर चालवून उदरनिर्वाह करतो. शुक्रवारी (ता. २४) रोजी सकाळी ८ वाजता घरी असताना त्याच्या आईने चहाने भरलेला ग्लास कपाटावर ठेवला होता. याचवेळी पंकज नन्नवरे हा जेवण करण्यासाठी बसत असताना त्याचा चहाच्या ग्लासला धक्का लागला. त्यात ग्लासमधील उकळती चहा पाठीवर पडल्याने तो गंभीररीत्या भाजला गेला. बांभोरी येथील खासगी डॉक्टराकडून प्रथमोपचार घेतल्यानंतर जास्तच त्रास जाणवू लागल्याने कुटुंबीयांनी त्याला जळगावी जिल्हा शासकीय वैद्यकीय महाविद्यालयात दाखल केले आहे. पंकजची प्रकृती बरी असून पुढील उपचार सुरू आहेत.