रत्नागिरी :  शासकीय वृक्ष लागवड यंदा कोरोनामुळे होणे अशक्य असताना रत्नागिरीतील नेहरु युवा केंद्र संलग्न सत्कोंडीतील अ‍ॅक्टिव्ह फण्ड्स सर्कल या संस्थेने सत्कोंडी येथे मुख्य रस्त्याच्या बाजुने सुमारे  100 पेक्षा जास्त झाडांची लागवड करत वृक्ष वल्ली आम्हा सोयरी.....चा संदेश दिला. यामध्ये बदाम, सुरु, रेन ट्री, लेप्टोस्पेरम, बहावा यांसारख्या वृक्षांचा समावेश होता.

सत्कोंडी गावातून जाणारा मुख्य रस्ता हा सुमारे दोन ते अडीच किलोमीटर लांबीचा असून जवळपास जांभ्या खडकातून जातो. या रस्त्याच्या बाजूने जांभ्या कातळात झाडे लावून जगवणे हे खरोखरच आव्हानात्मक काम आहे. मात्र अ‍ॅक्टीव्ह फण्ड्स सर्कल सत्कोंडीने ग्रामस्थांच्या सहकार्याने हे आव्हान लीलया पेललं आहे. रस्त्याच्या बाजूने उभी असणारी झाडे याची साक्ष देत उभी आहेत.

रविवारी ( 12)  झालेल्या वृक्षारोपण उपक्रमांत अ‍ॅक्टीव्ह फण्ड्स सर्कल सत्कोंडीचे सुमारे 50 सदस्य उपस्थित होते. नविन झाडांची लागवड तसेच जुन्या झाडांना खत माती देणे, आधार काठ्या लावणे, उपलब्ध टी गार्ड ने झाडे संरक्षित करणे, झाडांभोवती दगडी बांध घालणे अशी अनेक कामे यावेळी करण्यात आली. सकाळी  10 वाजता सुरु झालेले काम मध्यंतराचा काळ सोडता संध्याकाळी 7 वाजेपर्यंत सुरु होते. वृक्षारोपण हा शब्द दरवर्षी घासुन घासून गुळगुळीत झाला असला तरी वृक्षारोपण व वृक्ष संगोपन याबाबतीत सत्कोंडीकरांमध्ये निर्माण झालेला सकारात्मक दृष्टीकोन व जागृती निश्‍चितच अनुकरणीय आहे.

हेही वाचा- या महिलांनी घेतला पुढाकार अन् या बहुगुणी व बहुउपयोगी औषधाची केली लागवड.... -

रस्त्याशेजारी 300 रोपांची लागवड

या उपक्रमासाठी न्यू इंग्लिश स्कूलचे क्रीडाशिक्षक आणि अ‍ॅक्टीव्ह फण्ड्स सर्कल चे नितीन जाधव, प्रियांका व प्राजक्ता बंडबे, सुहास काताळे व सुचिता काताळे यांनी अल्पोहारची व्यवस्था करुन दिली होती. या उपक्रमास नेयुकेचे जिल्हा युवा समन्वय श्री. सैनी, श्री. गुरव, उपसरपंच सतीश थूळ यांचे मार्गदर्शन लाभले. जुलै महिन्यामध्ये वृक्षारोपण व वृक्ष संवर्धनासाठी फिजिकल डिस्टंसिंगचे पालन  ग्रामस्थांचे एक दिवसाचे श्रमदान शिबीर आयोजित करण्यात आले आहे. यावेळी आवळा, बेहडा, कुंभा, चाफा अशा सुमारे 300 रोपांचे रोपण करण्यात येणार आहे.

हेही वाचा- दिला इशारा मात्र जहाज समुद्रात : त्या जहाजाचा खर्च कोटीच्या घरात.... -

ग्रामस्थांचा संकल्प

भविष्यात सत्कोंडी ग्रामपंचायतीच्या सहकार्याने रस्त्याच्या बाजुने लावलेल्या झाडांच्या संवर्धनासाठी दोन किलोमीटर लांबीची ठिबक सिंचन व्यवस्था, झाडांसाठी चिर्‍याचे पक्के कट्टे, सुमारे 300 टी गार्डची निर्मिती करण्याचा संकल्प केला आहे.

संपादन - अर्चना बनगे