बांदा : बांदा (Banda) शहर ग्रामपंचायतीच्या प्रभाग क्रमांक चारमध्ये होणाऱ्या पोटनिवडणुकीत भाजपने राजाराम उर्फ बाळू सावळाराम सावंत (Balu Savlaram) यांना अधिकृत उमेदवारी जाहीर केल्याने आज अर्ज मागे घेण्याच्या शेवटच्या दिवशी ५ जणांनी अर्ज मागे घेतले आहेत. त्यामुळे या प्रभागात शिवसेनेचे समीर श्रीकांत पेळपकर (Sameer Pelpakar) व भाजपचे सावंत यांच्यात थेट लढत होणार आहे.

आज अर्ज मागे घेण्याच्या शेवटच्या दिवशी ऋषिकेश सीताराम देसाई, गोविंद केशव सावंत, लक्ष्मी राजाराम सावंत व निलेश मधुकर सावंत यांनी उमेदवारी अर्ज मागे घेतले; मात्र भाजपचे बांदा युवा मोर्चा मंडल उपाध्यक्ष संदीप बांदेकर यांनी उमेदवारी न दिल्यास अर्ज माघार न घेण्याचा इशारा दिला.

सावंतवाडी येथे भाजपचे महाराष्ट्र प्रदेश सचिव तथा माजी खासदार निलेश राणे (Nilesh Rane) यांनी बांदेकर यांची समजूत घातल्याने त्यांनी उशिरा अर्ज मागे घेतला. यावेळी पुढील ग्रामपंचायत निवडणुकीत उमेदवारी देण्याचा शब्द राणे यांनी दिल्याने उमेदवारी अर्ज मागे घेत असल्याचे बांदेकर यांनी सांगितले.

प्रभाग क्रमांक चारच्या पोटनिवडणुकीत एकूण ७ उमेदवारांनी अर्ज दाखल केले होते. बांदेकर यांनी माजी खासदार राणे यांची सावंतवाडी येथे भेट घेतली. त्यावेळी राणे यांनी पुढील निवडणुकीत उमेदवारी देण्याचा शब्द दिला. त्यामुळे आपण यापुढेही केंद्रीय मंत्री नारायण राणे, युवा नेते निलेश राणे यांच्या माध्यमातून भाजप पक्षाचे काम करणार असल्याचे बांदेकर यांनी सांगितले.

प्रभाग चारमध्ये पक्षाने दिलेला उमेदवार राजाराम सावंत यांना भरघोस मतांनी विजयी करण्याचा निर्धार यावेळी बांदेकर यांनी केला. यावेळी त्यांच्यासोबत सावंतवाडी नगराध्यक्ष संजू परब, बांदा मंडल प्रभारी प्रमोद कामत, नगरसेवक सुधीर आरीवडेकर, भाजपा युवा युवा मोर्चा जिल्हा उपाध्यक्ष जावेद खतिब, ज्ञानेश्वर सावंत, गुरुनाथ सावंत, प्रवीण पंडित दीपक सावंत, साई धारगळकर आदी उपस्थित होते. त्यामुळे आता सेनेचे पेळपकर व भाजपचे सावंत यांच्यात दुरंगी लढत होणार आहे. २१ ला मतदान होणार असून २२ ला निकाल जाहीर करण्यात येणार आहे.