सावंतवाडी - जणावरे चारण्यासाठी गेलेल्या महिलेवर अस्वलाने हल्ला केल्याची धक्कादायक घटना चाैकुळ येथे घडली आहे. या हल्यात महिला गंभीर जखमी झाली असून तिला उपचारासाठी सावंतवाडी येथे हलविण्यात आले आहे. सोनी मया पाटील (वय ४५) असे जखमी झालेल्या महिलेचे नाव आहे. 

याबाबत अधिक माहिती अशी, भेकुर्ली येथील सोनी पाटील या जळवाडी येथे गुरे राखण्यासाठी राहत होत्या. त्या जळ वाडी येथे खातशेत वाडी बुडबुडे जंगल येथे आज गुरांबरोबर गेली होत्या. त्यांच्यासोबत एक पुरुष सहकारीही होता. जणावरे चारत असताना आज सकाळी १० च्या दरम्यान एका अस्वलाने सोनी यांच्यावर हल्ला केला आणि त्यांच्या पाय आणि मांडीला चावा घेतला. आरडाओरडा केल्याने बरोबरच्या असलेल्या पुरुषाने अस्वलाला हाकलले. यानंतर जखमी महिलेला चिखलव्हल बेरडकी येथून आंबोली आरोग्य केंद्रातून १०८ रुग्णवाहिकेतून चौकुल येथे नेण्यात आले. या ठिकाणी डॉ. महेश जाधव आणि परिचारिका अस्मिता कोठावळे यांनी उपचार केले. यानंतर त्यांना सावंतवाडी कुटीर रुग्णालयात हलवण्यात आले आहे. चौकूळ येथील सामाजिक कार्यकर्ते पांडुरंग गावडे यांनी नातेवाईकांना माहिती दिली. आंबोली वनखात्याचे वनक्षेत्रपाल दिगंबर जाधव व वनपाल पृथ्वीराज प्रताप यांनी आरोग्य केंद्रात जाऊन महिलेची विचारपूस केली.

हे पण वाचा -  कोल्हापुरात डबलसीट दंडाच्या 'त्या' व्हायरल पोस्टच सत्य नेमकं काय ? 

हे पण वाचा - कासवाच्या गावातून हजारों पिल्ले समुद्राकडे झेपावली...