Baffalo: रेड्याच्या हल्ल्यात पारपोली येथील महिला गंभीर जखमी झाली. रश्मी रामकृष्ण गावकर (वय ४५, रा. गावठाणवाडी) असे तिचे नाव आहे. ही घटना आज सकाळी घडली. जखमी महिलेस तातडीने उपचारासाठी सावंतवाडी उपजिल्हा रुग्णालयात दाखल करण्यात आले.

रश्मी गावकर या नेहमीप्रमाणे आज सकाळी गोठ्यातून रेड्याला शेतात चारायला घेऊन जात होत्या. यावेळी अचानक रेड्याने त्यांच्यावर हल्ला केला. यात त्यांचे हात, पाय, डोके व छातीला गंभीर दुखापत झाली.

यानंतर रेड्याने शिंग खुपसून त्यांना गंभीर जखमी केले. ग्रामस्थ आणि कुटुंबीयांनी तातडीने त्यांना येथील उपजिल्हा रुग्णालयात दाखल केले. त्यांच्यावर रुग्णालयाचे डॉ. निखिल अवधूत यांनी प्राथमिक उपचार केले.

अधिक उपचारासाठी गोवा-बांबुळी येथे हलविण्यात आले. याबाबत पोलिस ठाण्यात कोणतीही नोंद करण्यात आली नाही. जीवनरक्षा प्रतिष्ठानचे अध्यक्ष राजू मसूरकर यांनी तातडीने रुग्णालयात जाऊन घटनेची माहिती घेतली.