दाभोळ (रत्नागिरी) - उपजिल्हा रुग्णालयात नेण्यासाठी आलेल्या आरोग्य कर्मचाऱ्यांची गाडी पाहून धूम ठोकलेल्या दापोली तालुक्यातील बोरिवली येथील कोरोना बाधित रुग्ण अखेर आज दुपारी 2 वाजणेच्या सुमारास म्हणजे 16 तासांच्या शोधानंतर जंगलात सापडल्याने त्याला शोधणाऱ्या शासकीय यंत्रणानी सुटकेचा निश्वास सोडला आहे.

दापोली तालुक्यातील 4 जणांना कोरोनाची लागण झाल्याचा अहवाल आल्यावर तालुक्यातील बोरिवली येथील शाळेत क्वारंटाइन केलेला व कोरोना बाधित असल्याचा अहवाल आलेल्या त्या व्यक्तीला दापोली येथे आणण्यासाठी आरोग्य विभागाची गाडी काल रात्री बोरिवली येथे गेली होती, या गाडीला पाहून मी लघुशंकेला जाऊन येतो असे सांगून त्या कोरोना बाधित व्यक्तीने तेथून पलायन केले होते. त्यामुळे त्या व्यक्तीला आणायला गेलेल्या आरोग्य कर्मचारी व ग्रामस्थ यांची पाचावर धारण बसली होती.

वाचा - एक हजार रुपये भाड्यासाठी तो घेवून आला दोन महिलांना ; अन् त्या निघाल्या कोरोना पॉझिटीव्ह...

या पळालेल्या कोरोना बाधित व्यक्तीचा रात्रभर परिसरातील जंगलात सर्वांनी शोध घेतला मात्र तो सापडला नाही. आज सकाळी पुन्हा आरोग्य विभागाचे कर्मचारी, ग्रामस्थ, उपविभागीय पोलीस अधिकारी प्रवीण पाटील, दाभोळ सागरी पोलीस ठाण्याचे सहाय्यक पोलीस निरीक्षक पवार, त्यांचे सहकारी व पोलीस मित्र यांनी या व्यक्तीचा पुन्हा शोध सुरू केला, पळून गेलेली ही व्यक्ती रात्रभर पळून थकली होती, जंगलातील एका पाणवठ्यावर पाणी पिऊन ती पुन्हा जंगलात पळत असे, शोध घेणाऱ्या पथकाच्या ते लक्षात आल्यावर त्यांनी या पाणवठ्यावर लक्ष ठेवले आज दुपारी ही पळालेली व्यक्ती पाणी पिण्यास तेथे आल्यावर सर्वांनी त्याला घेरल्यावर तो शरण आला. त्यानंतर त्याला दापोलीच्या उपजिल्हा रुग्णालयात दाखल करण्यात आले. दरम्यान हा कोरोना बाधित रुग्ण सापडल्यावर सर्वांनी सुटकेचा निश्वास सोडला आहे.