रत्नागिरी : जमिनीच्या वादाची मोठी किंमत खासगी कृषी सल्लागार म्हणून शेतात काम करणाऱ्या दाम्पत्याला मोजावी लागली. जमीन वादातून पंधराजणांच्या जमावाने काम करणाऱ्या दाम्पत्याला बेदम मारहाण केल्याचा प्रकार घडला.

तालुक्‍यातील हरचिरी-तळेकरवाडी येथे शुक्रवारी (ता. १२) सकाळी साडेदहाच्या सुमारास घटना घडली. या प्रकरणी ग्रामीण पोलिस ठाण्यात १५ संशयितांविरुद्ध गुन्हा दाखल केला आहे.
या प्रकरणी ग्रामीण पोलिस ठाण्यात देवजी रत्नाकर रोकडे, मनोहर महादेव तळेकर, अनिल सदाशिव तळेकर, सुनीता रोकडे, श्वेता तळेकर, रंजना तळेकर, सलोनी तळेकर, सुरेखा तळेकर, अस्मिता तळेकर, अंकेश तळेकर, शाम तळेकर, दत्ताराम तळेकर, विनोद तळेकर, नंदकुमार तळेकर, अशोक तळेकर (सर्व रा. तळेकरवाडी हरचिरी, रत्नागिरी) या संशयितांविरुद्ध गुन्हा नोंदविला आहे. हरचेरी-तळेकरवाडी येथे सर्वे नं. ८५ हिस्सा नं. १ येथे घटना घडली. 

हेही वाचा - अचानकच घराला लागली आग ; सुदैवाने कोणतीही जीवितहानी नाही -

प्रणीत पर्शुराम तारी (वय ४०, रा. लिंगायतवाडी, रत्नागिरी) हे व दीपाली मंगेश पांचाळ-तारी हे दाम्पत्य खासगी कृषी सल्लागार आहेत. ते धनंजय किरकिरे यांच्या तळेकरवाडीत शेतामध्ये काम करत होते; मात्र संशयित आणि किरकिरे यांच्यात जमिनीचा वाद होता. त्याचा राग संशयितांनी काम करणाऱ्या सल्लागार कुटुंबांवर काढला. पंधराजणांचा जमाव तेथे गेला. त्यांनी शेतातील काम बंद पाडले. सगळे कामगार येथून निघून जा, असा इशारा देत शिवीगाळ केली आणि दाम्पत्याला लाथाबुक्‍क्‍यांनी मारहाण करून धमकी दिली. या प्रकरणी प्रणीत तारी यांनी ग्रामीण पोलिस ठाण्यात तक्रार दिली. पोलिसांनी पंधरा संशयितांविरुद्ध गुन्हा दाखल केला आहे. पुढील तपास स. पो. नि. आबा पाटील करीत आहेत.

संपादन - स्नेहल कदम