रत्नागिरी : कोविड 19 महामारी भारतात येऊन सहा महिने झाले. त्यावर आधारित सामाजिक परिणामांचे निष्कर्ष काढणे घाईचे होईल. वैद्यकीय क्षेत्रातील गृहितकांना घेऊन ती सामाजिक क्षेत्राला सरळसोटपणे लागू करणे शक्य होणार नाही़  या महामारीच्या परिणामाचा अभ्यास करण्यासाठी सामाजिक शास्त्रज्ञांसमोर वेगवेगळे अभ्यास विषय आहेत. त्यासाठी अभ्यासक, संशोधकांनी शास्त्रीय परिमाणे विकसित केली पाहिजेत. सामाजिक वास्तव विभिन्न असल्याने या महामारीचा पडणारा प्रभावसुद्धा एकसारखा नाही़  तो समाजसापेक्ष आहे, असे प्रतिपादन प्रा. डॉ़  अनघा तेंडुलकर यांनी केले.

गोगटे-जोगळेकर महाविद्यालयाच्या सामाजिक शास्त्र मंडळाच्या वतीने प्रा. संजय जोशी स्मृती ऑनलाइन व्याख्यानात त्या बोलत होत्या. मुंबईच्या सोफिया महाविद्यालयातील समाजशास्त्र विभागात कार्यरत डॉ. तेंडुलकर यांनी कोविड 19 नंतरचे जग आणि सामाजिक शास्त्रातील बदलत्या संकल्पना यावर आपले विचार मांडले.

हेही वाचा- कौतुकच ; आता बाजारात येणार ‘ऑटोमॅटिक हँड सॅनिटायझर डिन्स्पेन्सर मशिन’ कसे वाचा.... -

त्या म्हणाल्या, कोविड अभ्यासासाठी संख्यात्मक संशोधनाबरोबरच गुणात्मक संशोधनाची आवश्यकता आहे. कोविड 19 चे अर्थक्षेत्रावरील परिणाम गंभीर आहेत. सामाजिक शास्त्रज्ञांना यापुढे स्थलांतराचा अभ्यास करताना या महामारीचा संदर्भ घेऊन पुढे जावे लागणार आहे़  शैक्षणिक क्षेत्रावर मोठा परिणाम होत आहे़  विद्यमान अध्ययन-अध्यापन पद्धती, परीक्षा पद्धती, मूल्यमापनावर प्रभाव पडला आहे़  गुगल क्लासरूम सारखा पर्याय पुढे येताना दिसत आहे.

हेही वाचा- वैभव मांगलेंवर झी मराठीचा विश्वास ; कोकणातील कलाकारांना सिरीयलमध्ये मिळाली काम करण्याची संधी..... -

अध्यक्षीय समारोप प्राचार्य डॉ़  किशोर सुाटणकर यांनी केला. समाजशास्त्र विभागाचे प्रमुख प्रा़  तुळशीदास रोकडे यांनी संजय जोशी यांच्या स्मृतींना उजाळा दिला. तर डॉ़  रामा सरतापे यांनी आभार मांडले. पाचशेपेक्षा जास्त विद्यार्थी, प्राध्यापकांनी व्याख्यानाचा लाभ घेतला. सामाजिक शास्त्र मंडळाचे समन्वयक प्रा़ शिवाजी उकरंडे, प्रा. सचिन सनगरे आणि प्रा़  प्रशांत लोंढे यांनी विशेष परिश्रम घेतले.

अनेक सकारात्मक परिणाम

कुटूंबासारख्या सामाजिक संस्थेने सामाजिक शास्त्रज्ञांचे लक्ष वेधले आहे़  लॉकडाऊनमुळे एकीकडे लोकांना घरातच राहावे लागत असून कुटूंबीयाना वेळ द्यायला संधी मिळाली आहे. पण दुसरीकडे कौटुंबिक हिंसाचारात वाढ होत आहे. महामारीचे नकारात्मक परिणाम दिसत असले तरी अनेक सकारात्मक परिणामही दिसून येत आहेत़  तरूण पिढी याकडे आव्हान म्हणून पाहत असल्याचे डॉ. तेंडुलकर म्हणाल्या.