सिंधुदुर्ग : 'व्हॅलेंटाईन डे' हा दोन-तीन दिवसावर आहे. शिवसेना हे माझं पहिलं प्रेम आहे, आणि जुन्या प्रेमाला कधी विसरायचं नसतं म्हणून मी माझे सात नगरसेवक शिवसेनेला दिले आहेत, असे वक्तव्य आमदार नितेश राणे यांनी केले आहे. वाभवे वैभववाडी नगरपंचायतीतून सात नगरसेनक आज शिवसेनेत प्रवेश करणार असल्याचे त्यांनी एका खासगी वृत्तवाहिनाला सांगितले. 

गृहमंत्री अमित शहा यांनी दोन दिवसांपूर्वीच कोकणचा दौरा केला. मात्र या दौऱ्याच्या दुसऱ्याच दिवशी वैभवाडीतले सात नगरसेवक शिवसेनेच्या वाटेवर जात असल्याचे बोलले जाते आहे. 'व्हॅलेंटाईन डे' दोन-तीन दिवसावर आहे. शिवसेना माझं प्रेम आहे आणि जुन्या प्रेमाला कधी विसरायचं नसतं अशी प्रतिक्रिया आज भाजपचे आमदार नितेश राणे यांनी दिली.

यावेळी ते म्हणाले, वैभव नगर पंचायतीची निवडणूक काही महिन्यांवर येऊन ठेपली आहे. आणि आत्ताची परिस्थिती पाहिली तर तिथे एकही शिवसेनेचा उमेदवारी नाही. त्यांचा उमेदवार नसल्याने सातच्या सात उमेदवार शिवसेनेला दिले आहेत. वैभववाडीत शिवसेनेची परिस्थिती अशी आहे, की त्यांना उमेदवारी भेटली नसती. मग आता मी असताना आमच्या जुन्या प्रेमावर मी असा कसा अन्याय करू. शेवटी शिवसेना पक्ष हा हिंदु हृदयसम्राट बाळासाहेब ठाकरे यांचा आहे. आणि बाळासाहेब आमच्या हृदयात आहेत. 

हेही वाचा - अमित शहांच्या दौऱ्यानंतर भाजपला मोठे खिंडार; सात नगरसेवक बांधणार शिवबंधन ?

पुढे ते म्हणाले, लाइफटाइम मेडिकल कॉलेजच्या संदर्भात रुटीन फाइल क्लिअर करण्यासाठी राणे साहेबांनी फोन केला होता त्यावेळी उद्धव यांनी सकारात्मक प्रतिसाद देऊन त्याच्यावर सही केली. शिवसेनेला आम्ही दुसरं काही देऊ शकत नाही, आणि दिले तरी ते स्वीकारणार नाहीत. म्हणून 'व्हॅलेंटाईन डे' च्या निमित्ताने सात नगरसेवक त्यांना भेट देत आहे. त्यांचा त्यांनी स्वीकार करावा अशी माझी अपेक्षा आहे.

शिवसेनेत उत्साह, भाजपकडून दुर्लक्ष

वाभवे वैभववाडी नगरपंचायतीचे 17 पैकी 17 नगरसेवक भाजपाचे आहेत. या नगरसेवकांची मुदत काही महिन्यापुर्वी संपली आहे. कोरोनामुळे या नगरपंचायतीची निवडणुक झालेली नाही. यात सात जण आता शिवसेनेत गेले आहेत; मात्र हा प्रवेश भाजपने फारसा मनावर घेतला नसल्याचे राणेंच्या प्रतिक्रीयेवरून स्पष्ट होत आहे. शिवसेनेच्या गोटात मात्र उत्साह आहे.

संपादन - स्नेहल कदम