राजापूर (रत्नागिरी) :  घराशेजारी काम करणार्‍या पाच ते सहा जणांना कोल्ह्याने चावा घेतल्याची घटना शनिवारी (ता. 18) सकाळी सव्वाआठच्या सुमारास तालुक्यातील दळे येथे घडली. अचानक घडलेल्या या घटनेने दळे परिसरात भीतीचे वातावरण पसरले आहे. दळे गावामध्ये सकाळी अचानक कोल्हा घुसला. घर परिसरामध्ये काम करत असलेल्या या कोल्ह्याने अनेकांना चावा घेत जखमी केले. सुरवातीला या घडलेल्या घटनेने लोकांनी धाडसाने कोल्ह्याला पिटाळण्याचा प्रयत्न केला. त्यावेळी या कोल्ह्याने या वाडीतून दुसर्‍या वाडीत धूम ठोकत अनेकांना चावा घेत जखमी केले.

हेही वाचा- कोकणात एकजुटीतून गावांचा विकास : सिद्ध केले मंडळ  गावासाठी....

दळेतील घटना ; आरोग्य केंद्रात उपचार

त्यामध्ये मार्गी तळे येथील दर्शना देविदास भोसले, गिरकरवाडी येथील प्रभाकर जनार्दन गिरकर, धरणवाडी येथील महेंद्र अंकुश लासे, लासेवाडी येथील नयना नारायण तांबे, कला पांडुरंग पाटील, नारायण परशुराम तांबे आणि बागेत काम करणारा एक नेपाळी युवक जखमी झाला आहे. या सर्वांना वीरेंद्र चव्हाण, नरेश गिरकर, राजेंद्र प्रसाद राऊत आदींनी तत्काळ जैतापूर प्राथमिक आरोग्य केंद्रात दाखल केले. ग्रामस्थांकडून माहिती मिळाल्यावर व्यावसायिक वैभव कुवेस्कर यांनी तत्काळ राजापूर वनविभाग कर्मचार्‍यांना याची माहिती दिली. वनरक्षक संजय रणधीर, वनपाल सदानंद घाडगे, वन कर्मचारी विजय म्हादये घटनास्थळी दाखल झाले. त्यांनी पोलिस पाटील लक्ष्मीकांत पालकर व ग्रामस्थांच्या उपस्थितीत पंचनामा करून जबाब घेतले.

हेही वाचा- वेळेचा सदुपयोग - एसटीच्या कारागिरांनी बनवले सॅनिटायझर टनेल...

तत्काळ मदतीची मागणी

कोल्ह्याच्या अचानक हल्ल्यामुळे परिसरात भीतीचे वातावरण असून वनविभागाकडून तत्काळ बंदोबस्त करण्यात यावा. तसेच जखमी ग्रामस्थांना शासनाकडून तत्काळ मदत मिळावी अशी अपेक्षा व्यक्त केली जात आहे