कणकवली (सिंधुदुर्ग): भारताप्रमाणेच विदेशातही धूमधडाक्यात गणेशोत्‍सव साजरा केला जातो. विदेशात प्रामुख्याने इको फ्रेंडली गणेशमूर्तीची मागणी असते. त्‍यामुळे खारेपाटण येथील हरेश पांचाळ आणि वेंगुर्लेतील विनय राजापूरकर यांनी खारेपाटण येथील गणेश चित्र शाळेत कागदी लगदा आणि मातीपासून तीन फुटाच्या गणेशमूर्ती तयार केल्या आहेत. यातील २५ गणेशमूर्ती यंदा आफ्रिका देशात रवाना झाल्‍या आहेत.

हरेश पांचाळ आणि विनय राजापूरकर यांनी गणेशमूर्ती आणि इतर कलाकुसरीच्या वस्तू तयार करून त्‍यांची ऑनलाईन विक्री करून रोजगाराचा मार्ग शोधला आहे. कोणताही पिढीजात वारसा नसतानाही हरेश आणि विनय या दोन मित्रांनी चार वर्षांपासून इको फ्रेंडली गणेशमूर्ती तयार करण्यास सुरूवात केली. त्‍यानंतर या मूर्ती ऑनलाइनच्या माध्यमातून विक्रीस उपलब्‍ध केल्या. यात चार वर्षांपूर्वी आफ्रिकेतून चार मूर्तींची मागणी आली. त्‍याची पूर्तता केल्‍यानंतर आता विदेशातून इको फ्रेंडली गणेशमूर्तींची मागणी वाढल्‍याचे हरेश पांचाळ म्‍हणाले.

तीन फुटाची गणेशमूर्ती पूर्ण होण्यास एक महिन्याचा कालावधी जातो. तसेच समुद्रमार्गे या मूर्ती पाठवायच्या असल्‍याने गणेशोत्‍सवाच्या चार महिने आधीपासूनच विदेशातील गणेशमूर्ती तयार केल्‍या जातात. साधारणतः: वाहतूक खर्चाचा समावेश करून सुमारे ५० हजार रूपये एका गणेशमूर्तीसाठी आकारणी केली जात असल्‍याचेही पांचाळ म्‍हणाले.

गतवर्षी कोरोनामुळे देश विदेशातून गणेशमूर्तींची मागणी नव्हती. यंदा मात्र आफ्रिका देशातून २५ गणेशमूर्तींची मागणी आली आणि त्‍याची पूर्तताही तत्काळ करण्यात आली आहे.

- हरेश पांचाळ, मूर्तीकार, खारेपाटण

इको फ्रेंडली गणेशमूर्तीची मागणी वर्षभर असते. त्‍यामुळे चित्रशाळेत वर्षभर मूर्ती तयार होतात. याशिवाय विविध प्रकारचे शोपिस तयार करून त्‍याची विक्री करतो. या शोपिसला देश- विदेशातही मागणी आहे.

- विनय राजापूरकर, मूर्तीकार, वेंगुर्ले