मालवण - मुंबई विद्यापीठाच्यावतीने आयोजित करण्यात आलेल्या युवा महोत्सवात येथील स. का. पाटील सिंधुदुर्ग महाविद्यालयाच्या "निर्वासित' या एकांकिकेने प्रथम क्रमांक मिळवित सुवर्णपदक पटकाविले. याचबरोबर पुरूष व स्त्री अभिनयातही प्रथम क्रमांक पटकाविला. सिंधुदुर्ग महाविद्यालयाच्या इतिहासात प्रथमच एवढे मोठे यश लाभले आहे. 

या एकांकिकेचे लेखन स्वप्नील जाधव, दिग्दर्शन गणेश गावकर, नेपथ्य रूपेश नेवगी, नेपथ्य सहाय देवेन कोळंबकर, श्रीरंग करवडकर, संगीत अक्षय दागंट, संगीत संयोजन पंकज गावडे यांनी दिले आहे तर यात वैभव वळंजू, प्रथमेश सामंत ललित चव्हाण, जान्हवी बिरमोळे, स्नेहा चव्हाण, विजय पेडणेकर, भूषण माने आदी कलाकार सहभागी झाले होते.

महाविद्यालयाचे सांस्कृतिक विभागप्रमुख प्रा. एस. पी. खोबरे यांनी महोत्सवाची जबाबदारी सांभाळली. सांस्कृतिक विभागाचे सर्व सहकारी, प्राचार्य डॉ. श्रीरंग मंडले, संस्थेचे सर्व पदाधिकारी, प्राध्यापक, विद्यार्थी, शिक्षकेतर कर्मचाऱ्यांचे तसेच मालवणातील नाट्यरसिकांचे सहकार्य लाभले. सिंधुदुर्ग महाविद्यालयाच्या यशाबद्दल सर्वत्र कौतुक होत आहे.