रत्नागिरी: चिपळूण येथील लोकमान्य टिळक स्मारक वाचनालयातील वस्तुसंग्रहालयाच्या उभारणीसाठी ५० लाखांचा निधी दिला जाईल, अशी माहिती उच्च आणि तंत्रशिक्षण मंत्री उदय सामंत यांनी दिली.

गेल्या २२ जुलै रोजी चिपळूणमध्ये आलेल्या महापुरात दुकानांचे, घरांचे मोठे नुकसान झाले. अनेक संस्थांनाही याचा फटका बसला. शतकोत्तर सुवर्णमहोत्सव साजरा करणाऱ्या लोकमान्य टिळक वाचनालयाने दोनच वर्षांपूर्वी ऐतिहासिक वस्तूंचे एक संग्रहालय उभे केले होते. त्यामध्ये जुन्या काळातील नाणी, जुने दस्तऐवज, बॉण्ड पेपर, जुन्या मूर्ती असे बरेच काही महापुरात खराब झाले. काही वस्तू वाहून गेल्या.

चिपळूण शहरासह कोकणचे वैभव असलेल्या या वस्तुसंग्रहालयाच्या उभारणीसाठी सामंत यांनी ५० लाख रुपये निधी देण्याचे जाहीर केले आहे. रत्नागिरी पालिकेला विकासकामांसाठी साडेचार कोटींचा निधी आला आहे. त्यातील केवळ चार कोटींच्या निधीची सध्या आवश्यकता आहे. त्यामुळे त्यातील पन्नास लाख रुपये वस्तुसंग्रहालयाच्या आणि वाचनालयाच्या उभारणीसाठी देत असल्याची घोषणा उदय सामंत यांनी केली.