सिंधुदुर्गनगरी - शासकीय कर्मचाऱ्यांच्या सोयीसाठी कणकवली आगारातून सोडण्यात येणाऱ्या एसटी बसच्या वेळेमध्ये बदल केल्याने कर्मचाऱ्यांची मोठी गैरसोय होत आहे. याबाबत जिल्हाधिकाऱ्यांचे आदेश होऊनही त्यामध्ये कोणती सुधारणा होत नसल्याने कर्मचाऱ्यांमध्ये संताप व्यक्त होत आहे. 

कोरोनाच्या पार्श्‍वभूमीवर मुख्यालयाच्या ठिकाणी कर्मचाऱ्यांना ने-आण करण्यासाठी कणकवली बस स्थानकावरून एसटी बस सोडण्यात आली तर या बसमध्ये सामाजिक अंतर ठेवून 33 प्रवासी वाहतूक करण्याबाबत आदेश देण्यात आले; मात्र एसटी महामंडळाकडून नियमांचे उल्लंघन करत प्रमाणापेक्षा जास्त प्रवासी वाहतूक होत असल्याबाबत शासकीय कर्मचाऱ्यांनी लेखी निवेदनाद्वारे जिल्हाधिकाऱ्यांची लक्ष वेधले होते. कणकवलीवरून सिंधुदुर्गनगरी येणाऱ्या कर्मचाऱ्यांची संख्या अधिक असल्याने दोन एसटी बस सोडण्याची व्यवस्था करण्याबाबत आदेश दिले होते. तरीही कणकवली एसटी प्रशासनाकडून एकच बस सोडण्यात येत आहे. या बसमध्ये सामाजिक अंतर न ठेवता अधिक प्रवाशांची वाहतूक करून नियमांचे उल्लंघन होत आहे. 

सध्या कोरोनाचा प्रादुर्भाव मोठ्या प्रमाणात होत असून जिल्ह्यात रुग्णसंख्येत वाढ होत आहे. जिल्हा सामान्य रुग्णालय येथे सेवेत असलेले काही कर्मचारी कणकवलीतुन त्याच एसटी बसमधून प्रवास करीत आहेत. या कर्मचाऱ्यांचा प्रत्यक्ष व अप्रत्यक्षरित्या कोरोना रुग्णाशी संपर्क येत आहे. त्यांच्यापासून अन्न कर्मचाऱ्यांना बाधा होण्याची शक्‍यता आहे. तरी रुग्णालयातील कर्मचाऱ्यांसाठी एसटीची स्वतंत्र व्यवस्था करावी तसेच मुख्यालय कर्मचाऱ्यांसाठी सोडण्यात आलेल्या सकाळी सव्वानऊ वाजता व सायंकाळी साडेसहा वाजता सुटणाऱ्या बसच्या वेळेत बदल करण्यात येऊन तो सकाळी नऊ वाजता व सायंकाळी पावणेसहा वाजता, अशी केली असून ती चुकीची आहे. 

अपर जिल्हाधिकाऱ्यांचे आदेश 
कार्यालय सुटण्यापूर्वी बस निघून जात असल्याने कर्मचाऱ्यांची गैरसोय होत आहे. याबाबत कर्मचाऱ्याने जिल्हाधिकाऱ्यांचे लक्ष वेधले असता ही बस कार्यालयीन वेळेनुसार सकाळी सव्वानऊ वाजता व सायंकाळी साडेसहा वाजता सोडावी व ही बस विनाथांबा करण्यात यावी. त्यामध्ये सामाजिक अंतर राखण्यात यावे, असे आदेश अप्पर जिल्हाधिकारी शुभांगी साठे यांनी एसटी विभाग नियंत्रक कणकवली यांना दिले आहेत.