चिपळूण (रत्नागिरी) : राज्यातील वीजनिर्मितीसाठी कोयना धरणातून दहा महिन्यांत ४४ टीएमसी पाण्याचा वापर वीजनिर्मितीसाठी झाला असून, वीजनिर्मितीसाठी अद्याप २३ टीएमसी पाणीसाठ्याचा वापर होणार आहे. सध्या कोयना धरणात ७३.७० टीएमसी इतका सर्वाधिक व मुबलक पाणीसाठा असल्याने चालू वर्षी पाण्याअभावी वीजनिर्मिती बंद पडणार नाही. परिणामी, राज्यावर ऐन उन्हाळ्यात भारनियमनाचा भार पडण्याची शक्‍यता मावळली आहे. 

या वर्षी मार्चच्या दुसऱ्या आठवड्यापर्यंत कोयनेतून दोन हजार १५८ दशलक्ष युनिट इतकी वीजनिर्मिती करण्यात आली आहे. गतवर्षी जूनपासूनच कोयना पाणलोट क्षेत्रात मुसळधार पावसाने हाहाकार माजवला असल्यामुळे धरणात पाण्याची उच्चांकी आवक झाल्याने धरण तीन वेळा ओव्हरफ्लो झाले. परिणामी धरणातील पाणी नियंत्रणासाठी धरणाचे सहा वक्र दरवाजे १६ फुटांपर्यंत उचलण्यात आले. धरण पाणलोट क्षेत्रातील पाथरपुंज या पर्जन्यमापन केंद्रावर तर सर्वाधिक म्हणजे १० हजार मिलिमीटर इतक्‍या ऐतिहासिक पावसाची 
नोंद झाली. 

हेही वाचा- या पठ्ठ्याने चोरली चक्क मंदिरातील दानपेटी अन्....

तीन वेळा धरण ओव्हरफ्लो
परिणामी, धरणाच्या साठ्यात ऑक्‍टोबरपर्यंत तब्बल २३५.४२ टीएमसी इतक्‍या ऐतिहासिक पाण्याची आवक झाली; तर धरणातून १२७.४८ टीएमसी इतक्‍या प्रचंड पाण्याचा विसर्ग करण्यात आला होता.गतवर्षातील मुसळधार झालेल्या पावसामुळे कोयना धरण एका वर्षात तीनवेळा भरले. पाणी नियंत्रणासाठी तब्बल सातवेळा विसर्ग केला, मात्र जूनपासून ऑक्‍टोबरपर्यंत धरणातील पाण्याची पातळी कमी झाली नाही. त्यामुळे सध्या मार्च महिन्याचा दुसरा आठवडा संपला तरी कोयना धरणात दहा महिन्यांची वीजनिर्मिती करण्यात आली असून आजपर्यंत ती दोन हजार १५८ दशलक्ष युनिट इतकी झाली आहे. 

हेही वाचा- रत्नागिरीत २२ लाखांच्या खुर्ची घोटाळ्याचा पर्दाफाश...

अजून दोन महिने पाणीसाठ्याचा वापर
कृष्णा पाणीवाटप लवादानुसार अजून दोन महिने पाणीसाठ्याचा वापर होणार असून, त्यासाठी धरणात अद्यापही ७३ टीएमसी पाणीसाठा शिल्लक आहे. त्यामुळे राज्यातील जनतेला चालू वर्षातही भारनियमनाची शक्‍यता नाही.