देवरूख (रत्नागिरी)  : संगमेश्‍वर तालुक्‍यातील ग्रामपंचायतींच्या सरपंचपदाची आरक्षण सोडत १५ डिसेंबरला निघणार आहे. यामुळे आता नव्या वर्षात ग्रामपंचायतीच्या निवडणुकीची रणधुमाळी होणार, हे स्पष्ट झाले आहे. या निवडणुकीत राज्यात सत्ताधारी असलेल्या शिवसेना- राष्ट्रवादी आणि काँग्रेसची आघाडी होणार का, याकडे राजकीय वर्तुळाचे डोळे लागले आहेत.

तालुक्‍यात १२६ ग्रामपंचायती आहेत. यापैकी ८० पेक्षा अधिक ग्रामपंचायतींची मुदत संपल्याने या सर्व ग्रामपंचायतींची अंतिम मतदार यादी प्रसिद्धीचा कार्यक्रम सुरू आहे. येत्या १५ डिसेंबरला या सर्व ग्रामपंचायतींच्या सरपंचपदाचे आरक्षण काढले जाणार आहे. जनतेतून सरपंच निवडीचा फडणवीस सरकारचा अध्यादेश विद्यमान महाविकास आघाडी सरकारने रद्द केल्याने आता सदस्यांमधूनच सरपंच निवड होणार आहे. परिणामी, सरपंचपदाच्या आरक्षणाला मोठे महत्व आले आहे.

हेही वाचा -  सगळं आहे ! फक्त पोरगी मिळाली पाहिजे ;  व्यथा तिशी ओलांडलेल्या मुलांची -

संगमेश्‍वर तालुक्‍यात ६० टक्‍के ग्रामपंचायतींवर शिवसेनेचे वर्चस्व आहे तर उर्वरित ग्रामपंचायती भाजप, राष्ट्रवादी व स्थानिक पातळीवरच्या आघाडीकडे आहेत. राज्यात महाविकास आघाडी स्थापन झाल्याने तीनही पक्षांनी यापुढे स्थानिक स्वराज्य संस्थांच्या निवडणुकाही एकत्रित लढवणार असल्याचे यापूर्वीच जाहीर केले आहे. मात्र, या सरकारला एक वर्ष पूर्ण झाले तरी संगमेश्‍वर तालुक्‍यात तीनही पक्षात समन्वय असल्याचे चित्र नाही. यामुळे या निवडणुकीत हे तीनही पक्ष एकत्र येणार की नाही याबाबत उत्सुकता वाढली आहे. 

एकत्र आल्यास शिवसेनेला अन्य दोन पक्षांना समान वाटा द्यावा लागू शकतो. परिणामी सेनेचे वर्चस्व आपोआप कमी होऊ शकते. याउलट शिवसेना स्वबळावर लढली तर त्यांना सर्व ग्रामपंचायती लढून चांगल्यापैकी यश मिळू शकते अशी स्थिती आहे. या वेळी तालुक्‍यात भाजप आणि शिवसेनेत जंगी सामना होण्याची चिन्हे आहेत.

हेही वाचा - शिवसेनेने जागा दिल्या तरच महाविकास आघाडीचा विचार करू -

‘राष्ट्रवादी’ही स्वबळावरच रिंगणात शक्‍य

तालुक्‍यात काँग्रेसच्या तुलनेत शिवसेनेपाठोपाठ ‘राष्ट्रवादी’ची ताकद आहे. आमदारही ‘राष्ट्रवादी’चेच असल्याने ‘राष्ट्रवादी’ही स्वबळावरच रिंगणात उतरू शकते. परिणामी, महाविकास आघाडी जुळताना कठीण होऊ शकते, असा मतप्रवाह आहे. पक्षाला अस्तित्वात ठेवण्यासाठी महाविकास आघाडी झाली तर काँग्रेसला संजीवनी मिळू शकते.

संपादन - स्नेहल कदम