बांदा (सिंधुदुर्ग) : सिंधुदुर्ग जिल्ह्यातील सावंतवाडी तालुक्यातील डेगवे-मोयझरवाडी येथील दिनेश शांताराम देसाई (वय ४५) यांचा आज पहाटे गोवा-बांबोळी रुग्णालयात माकडतापाने मृत्यू झाला. गेले दीड महिने त्यांच्यावर रुग्णालयात अतिदक्षता विभागात उपचार सुरू होते. सावंतवाडी तालुक्यातील माकडतापाचा हा दुसरा बळी आहे.

हेही वाचा- गुटखा तस्करीच्या या गॅंग’ला अखेर मोका : आंतरराज्य टोळीवर कारवाई

जिल्ह्यातील दुसरा बळी​

दिनेश देसाई यांना माकडताप झाल्याचे निदान झाले होते. सुरुवातीला त्यांना सावंतवाडी येथील खासगी रुग्णालयात उपचारासाठी दाखल करण्यात आले होते. मात्र त्यांची प्रकृती बिघडल्याने ८ फेब्रुवारी रोजी त्यांना गोवा-बांबोळी रुग्णालयात हलविण्यात आले होते. तेथे त्यांच्यावर अतिदक्षता विभागात उपचार सुरू होते. मात्र त्यांची प्रकृती उपचारांना साथ देत नव्हती. अखेर आज पहाटे त्यांची प्राणज्योत मालविली. पंधरा दिवसांपूर्वी सावंतवाडी तालुक्यातील पडवे-माजगाव येथील लक्ष्मण शिंदे यांचा देखील माकडतापाने मृत्यू झाला होता.

 हेही वाचा-ब्रेकिंग - अखेर अंबाबाई मंदिर दर्शनासाठी बंद...

 आणखी दोन रुग्ण  सापडले
दोन दिवसांपूर्वी तालुक्यातील भालावल येथे दोन रुग्ण माकडताप पॉझिटीव्ह सापडले असून त्यांच्यावर तळकट (ता. दोडामार्ग) येथे प्राथमिक आरोग्य केंद्रात उपचार सुरू आहेत. ऐन काजू हंगामात गेल्या पंधरा दिवसात माकडतापाने दोन बळी गेल्याने तालुक्यात भीतीचे वातावरण निर्माण झाले आहे.