चिपळूण - सतत मुसळधार पडणाऱ्या पावसामुळे मुंबई-गोवा महामार्गावरील परशुराम घाटात मातीसह दरड खाली आहे. यामुळे वाहतूकीसाठी महामार्ग बंद करण्यात आला आहे. घटनास्थळी संबंधित ठेकेदार आणि प्रशासकीय अधिकारी पोहचले आहेत. पर्यायी वाहतूक लोटे चिरणी कळबस्ते मार्गे वळवण्यात आली आहे. (mumbai goa highway parshuram ghat landslide)

पाऊस सुरू झाल्यापासून घाटात किरकोळ दरडी कोसळण्याचे प्रकार सुरू झाले आहेत. शनिवारी रात्री साडेदहा वाजता परशुराम घाटातील देवाची पायवाट या ठिकाणी मातीचा डोंगर रस्त्यावर आला त्यामुळे पूर्ण रस्त्यावर माती पसरली होती. हा प्रकार नागरिकांना समजल्यानंतर त्यांनी तत्काळ प्रांताधिकारी कार्यालय संबंधित ठेकेदार आणि पोलिसांना त्याची कल्पना दिली. पोलिस घटनास्थळी दाखल झाले आणि दोन्ही बाजूची वाहतूक तत्काळ बंद करण्यात आली

तसेच संबंधित ठेकेदाराने रस्त्यावरील दरड हटवण्याचे काम सुरू केले. सुमारे दोन तास दरड हटवण्याचे काम सुरू होते. रस्त्यावरची माती पूर्णपणे बाजूला केल्यानंतर रस्ता पुन्हा वाहतुकीसाठी मोकळा करण्यात आला. वाहतूक कोंडी होऊ नये यासाठी मुंबई गोवा महामार्गावरील वाहतूक चिरणी मार्गे वळवण्यात आले आहे.

परशुराम घाटात वारंवार दरडी कोसळून मोठी हानी होण्याचा धोका लक्षात घेऊन एप्रिल आणि मे महिन्यात हा घाट काही दिवसासाठी बंद करण्यात आला होता. यादरम्यान घाटातील धोकादायक डोंगरकटाई करण्यात आली होती. मात्र त्यानंतरही दरडी कोसळण्याचे प्रकार आहेत. त्यामुळे नागरिकांमध्ये अजूनही भीतीचे वातावरण आहे.