लांजा : पावसाळी पर्यटनाच्या दृष्टीने हक्काचे ठिकाण असलेल्या तालुक्यातील खोरनिनको धरण आणि मानवनिर्मित धबधबा सध्या पूर्ण क्षमतेने वाहू लागला आहे. निसर्गाचे हे विलोभनीय दृश्य ‘याचि देही- याचि डोळा’ पाहण्यासाठी सध्या या ठिकाणी पर्यटकांचा ओघ वाढू लागला आहे.

शहरापासून २० किलोमीटरवर निसर्गाच्या सान्निध्यात आणि सह्याद्रीच्या कडेकपारीत खोरनिनको गावातील खोरनिनको धरण आणि येथील मानवनिर्मित धबधबा हा गेल्या काही वर्षांत पर्यटकांसाठी व पर्यटनाचे हक्काचे ठिकाण बनले आहे. भुशी डॅम अशी ओळख बनलेल्या खोरनिनको धरणाचे मनमोहक रूप पाहण्यासाठी गेल्या चार ते पाच वर्षांत या खोरनिनको धरण आणि धबधब्यावर जिल्ह्यासह सिंधुदुर्ग, कोल्हापूर येथील येणाऱ्या पर्यटकांची संख्या दिवसेंदिवस वाढत आहे. मात्र, पर्यटनाच्या दृष्टीने आजही या ठिकाणी म्हणाव्या तशा सेवा सुविधा उपलब्ध नसल्याने या ठिकाणी येणाऱ्या पर्यटकांचा हिरमोड होतो.