साडवली - बारावी परीक्षेला जाणार्‍या विद्यार्थ्यांना वेळेत पोचण्याचे बंधन बोर्डाने घातले आहे. मुलांचा वाहतुक कोंडीत वेळ जावू नये म्हणुन रत्नागिरी शिरगाव येथील सेवाभावी रिक्षा व्यावसायिकांनी नवाच फंडा शोधून काढला. शिरगाव वाहतुक कोंडीत अडकल्यास विद्यार्थ्यांनी फोन करावा, त्यांना परीक्षा केंद्रात मोफत सोडण्यात येईल, असे सोशल मिडीयावर तसेच त्या भागात बॅनर लावून जाहीर करण्यात आले आहे.

सेवाभावी रिक्षा व्यावसायिक सुबहान तांबोळी, फारुक तांबोळी, करीम मुजावर, करीम तांबोळी, गणेश भरणकर, परेश कुमटेकर, शुभम शिंदे यांनी हा उपक्रम जाहीर केला आहे. या नविन सेवेमुळे या रिक्षा व्यावसाईकांचे कौतुक होत आहे. मुलांसाठी मोफत सेवा देऊन एक चांगले काम या लोकांनी केले आहे. आज (बुधवारी) पहील्याच पेपरला दोन मुलींनी फोन करुन ही सेवा अनुभवली. या दोन मुलींना परीक्षा केंद्रावर वेळेत सोडण्यात आले.

गेल्यावर्षीही या उपक्रमाचा चाळीस मुलांनी लाभ घेतला. यावर्षी मुलांची संख्या वाढल्यास गैरसोय होवू नये, यासाठी ६ रिक्षा आणि दोन सुमो तयार ठेवण्यात आले आहेत.

- सुबहान तांबोळी

या उपक्रमाची माहिती वाहतुक पोलीसांनाही देण्यात आली आहे. त्यामुळे कोणत्याही विद्यार्थ्याला अडचण आल्यास तात्काळ ती सोडवली जात आहे. रिक्षा व्यावसायीकांचे या उपक्रमामुळे अभिनंदन होत आहे.