कणकवली/कुडाळ : ‘जनसंवाद’ यात्रेनिमित्त शिवसेना पक्षप्रमुख उद्धव ठाकरे (Uddhav Thackeray) आज (ता. ४) सिंधुदुर्ग दौऱ्या‍वर येत आहेत. तिन्ही विधानसभा मतदारसंघांतील कार्यकर्त्यांशी ते विविध कार्यक्रमांच्या माध्यमातून संवाद साधणार आहेत. त्यांची जाहीर सभा कणकवलीत उपजिल्हा रुग्णालयासमोर सायंकाळी पाचला आहे.

जनसंवाद यात्रेनिमित्त ते सध्या कोकण दौऱ्या‍वर आहेत. या पार्श्‍वभूमीवर आरोप-प्रत्यारोप सुरू आहेत. आजच्या दौऱ्याची शिवसेनेने (Shiv Sena) जय्यत तयारी केली आहे. खासदार विनायक राऊत (Vinayak Raut), आमदार वैभव नाईक, शिवसेना उपनेते अरुण दुधवडकर, जिल्हाप्रमुख संदेश पारकर, विधानसभाप्रमुख सतीश सावंत, विधानसभा संपर्कप्रमुख अतुल रावराणे, युवासेना जिल्हाप्रमुख सुशांत नाईक, युवासेना तालुकाप्रमुख उत्तम लोके, कन्हैया पारकर आदी दौऱ्याचे नियोजन करीत आहेत.

राऊत म्हणाले, ‘कणकवलीत होणारी जाहीर सभा म्हणजे लोकसभा निवडणुकीचे रणशिंग फुंकले जाणार असल्याचे मानले जात आहे. जाहीर सभेमुळे शिवसैनिकांत उत्साह आहे. उध्दव ठाकरे दुपारी साडेबारा वाजता गांधी चौक-सावंतवाडी आणि कुडाळ-जिजामाता चौक येथे कॉर्नर सभा घेऊन जनतेशी संवाद साधतील. दुपारी तीनला सिंधुदुर्ग किल्ल्यावर छत्रपती शिवाजी महाराज मंदिरातील सिंहासन आणि मंदिर नूतनीकरणाचे शिवप्रेमींना लोकार्पण करणार आहेत.

त्यानंतर पाचला आंगणेवाडी भराडी देवीचे दर्शन घेऊन सायंकाळी सहाला कणकवली उपजिल्हा रुग्णालयासमोर जाहीर सभेत संबोधित करणार आहेत. दरम्यान, कुडाळातही शिवसेनेने जय्यत तयारी केली आहे. या पार्श्वभूमीवर आमदार नाईक यांनी तयारीचा आढावा घेतला. जिल्हा पोलिस अधीक्षक सौरभकुमार अग्रवाल यांनीही पाहणी करून वाहतूक व्यवस्था व सुरक्षा व्यवस्थेचा आढावा घेतला. शहरातील जिजामाता चौक येथे सभेसाठी स्टेज उभारण्यात आले आहे.

उद्या रत्नागिरीत येणार

उद्धव ठाकरे सोमवारी (ता. ५) रत्नागिरी जिल्ह्याच्या दौऱ्यावर येणार आहेत. राजापूर धूतपापेश्वर मंदिरात दर्शन घेऊन रत्नागिरी आठवडा बाजार ठिकाणी जनतेशी संवाद साधणार आहेत. त्यानंतर मुंबई-गोवा महामार्गाच्या दुरवस्थेची पाहणी करणार आहेत व सायंकाळी चिपळूण येथे जनतेशी संवाद साधणार आहेत.