कणकवली : जिल्हा बँकेचे अध्यक्ष तथा शिवसेना नेते सतीश सावंत (Satish Sawant) यांचे निकटवर्ती असलेले करंजे (Karanje) गावचे माजी सरपंच शिवसैनिक संतोष परब (Santosh Parab) यांच्यावर आज सकाळी अज्ञात दोन जणांनी चाकू हल्ला करून त्यांना गंभीर जखमी केले आहे. सिंधुदुर्ग जिल्हा बँक (Sindhdudurg Bank)निवडणुकीत परब यांचा थेट सहभाग असल्याने त्यांच्यावर हा हल्ला झाल्याचे बोलले जात आहे. पोलिसांनी जागोजागी नाकाबंदी केली असून, संशयित आरोपी हे कनेडी पर्यंत पसार झाल्याचे आतापर्यंत स्पष्ट झाले आहे.

याबाबत माहिती अशी, संतोष परब हे कणकवली शहरातील कनक नगर येथे साक्षी अपार्टमेंटमध्ये राहतात. आज सकाळी साडे दहाच्या सुमारास शहरातून मोटरसायकलने घराकडे जात असताना घरापासून काही अंतरावर नरडवे रस्त्यावर सिल्वर कलरच्या इनोव्हा गाडीतून अज्ञात आणि त्यांना त्यांच्या दुचाकीला धडक दिली. ते खाली पडल्यानंतर गाडीतून उतरलेल्या दोघांनी त्यांच्या छातीत धारदार हत्याराने हल्ला केला. या घटनेनंतर जखमी परब यांना येथील उपजिल्हा रुग्णालयात दाखल करण्यात आले आहे. घटनास्थळी शिवसेना नेते सतीश सावंत यांच्यासह नगरसेवक कन्हैया पारकर सुशांत नाईक, राजू शेट्टी राजू राठोड भास्कर राणे, बेनी डिसोजा व अन्य शिवसेनेचे कार्यकर्ते दाखल झाले.

पोलिस निरीक्षक सचिन हुंदळेकर तसे पोलीस पथक आरोपीचा शोध घेत आहेत. पोलिस उपविभागीय अधिकारी नितीन कटेकर ही घटनास्थळाची पाहणी करून उपजिल्हा रुग्णालयात दाखल झाले होते. या घटनेचे गांभीर्य वाढले असून, जिल्हा बँक निवडणूकीच्या पार्श्वभूमीवर हा हल्ला झाल्याचे बोलले जात आहे.