कुडाळ ( सिंधुदुर्ग ) - कोरोना म्हणजे आज जगासमोर उभा राहिलेला आरोग्यविषयक महाभयंकर प्रश्न. या समस्येने जीवितहानी घडवली. त्यात अनेक निरपराध व्यक्ती बळी पडण्याच्या बातम्या आज रोज आपण ऐकतो, पाहतो. हे "आधार' या लघुपटातून साकारण्याचा प्रयत्न केला आहे. कुटुंबाचा आधार गेल्यावर काय संकट उभे राहते? याचे वास्तव चित्रण यातून दिसते. 

स्नेहांश एंटरटेनमेंट आणि हेल्पिंग हॅंड यांच्या समन्वयातून तसेच श्रीगणेश साहित्यकला मंच व अक्षरसिंधु साहित्यकला मंच कणकवली यांच्या सहयोगाने निर्मिती केला गेलेला "आधार' हा नवीन लघुचित्रपट सध्या सोशल मीडियावर चांगलाच व्हायरल होतोय. मुंबईतून कोरोनामुळे मृत्युमुखी पडलेल्याची संख्या वाढत आहे. सुरक्षिततेच्या उद्देशाने अनेक चाकरमानी आपापल्या गावी जाण्याचा प्रयत्न करतात; परंतु कोरोना सर्वत्र पसरू नये यासाठी तो पसरण्यापूर्वीपासूनच सेवा बजावणाऱ्या पोलिस दल, आरोग्यसेवा अशा विभागात काम करणाऱ्या लोकांनाही आपल्या गावी जाण्याची व सुरक्षित राहण्याची गरज पूर्ण करता येत नाही. अशावेळी एका सेवा महत्त्वाची मानून गावी जाणे टाळत मुंबईतच सेवा बजावणाऱ्या कर्तव्यदक्ष पोलिस कर्मचाऱ्यावर आलेले कोरोनाचे संकट गावी निघून गेलेल्या त्याच्या वडिलांना समजते तेव्हा होणारी त्यांची घालमेल, वडील व नवऱ्याच्या काळजीने व्याकुळ झालेल्या बायका, मुलांचं मन मांडण्याचा प्रयत्न या लघुचित्रपटात केला आहे.

यामध्ये दीपक परब, ऍड. संजय राणे, प्रणाली चव्हाण, रुद्राली परब, सृष्टी देसाई, सिद्धेश खटावकर, प्रमोद तांबे आदी कलाकारांनी भूमिका साकारल्या आहेत. "आधार' हा लघुचित्रपट एका वेगळ्या मात्र सद्यस्थितीत महत्त्वाच्या विषयावर भाष्य करणारा ठरत आहे. "खांदो' या लेखक महेश गोसावी यांच्या मूळ कथेवर आधारित या लघुचित्रपटाची संकल्पना, संवादलेखन व दिग्दर्शन प्रा. शेखर गवस, छायांकन नितेश चिंदरकर व साहिल राणे, संकलन रविकिरण शिरवलकर यांची असून निर्मिती मयूर चव्हाण यांनी केली आहे. या कलाकृतीसाठी रामचंद्र कुबल, अमोलिक मांगले, वैशाली मांगले, चेतन तेंडुलकर, रमेश झेमणे, सागर नांदगावकर, अजय फोंडेकर, दयानंद कसालकर, आनंद जाधव, सत्यवान गावकर, विठ्ठल चव्हाण, शशांक परब, मनेश चिंदरकर इत्यादींचे सहकार्य लाभले.