ओरोस : जिल्हा बँकेच्या (Bank Election 2021) मतदार यादीतून नाव डावलल्याबाबत उच्च न्यायालयात दाखल याचिका फेटाळण्यात आली. त्यामुळे लांबणीवर टाकलेली जिल्हा बँकेची निवडणूक प्रक्रिया सोमवारपासून सुरू होण्याची शक्यता आहे. राज्य सहकार निवडणूक प्राधिकरणने जिल्हा बँकेच्या संचालक मंडळाची निवडणूक घेण्याचे आदेश जिल्हा सहकार विभागाला दिले आहेत. या विभागाने निवडणूक कार्यक्रम तयार करून कोकण विभागीय सहकार आयुक्त यांच्याकडे पाठविला आहे. त्याला मान्यता मिळून सोमवारपासून जिल्हा बँक निवडणूक आचारसंहिता लागण्याची शक्यता आहे.

मे २०२० मध्ये मुदत संपलेली असताना कोरोनामुळे दीड वर्ष लांबलेल्या जिल्हा बँकेच्या संचालक मंडळाच्या निवडणुकीसाठी ऑक्टोबरमध्ये अंतिम मतदार यादी जाहीर करण्यात आली होती. त्यामध्ये ९८२ मतदार निश्चित केले होते. अंतिम मतदार यादीनंतर निवडणूक कार्यक्रमाकडे सर्वांचेच लक्ष होते. निवडणूक कार्यक्रम जाहीर होणार असतानाच मतदार यादीत नाव डावलले गेल्याने काही संस्थांनी उच्च न्यायालयात याचिका दाखल केली. परिणामी निवडणूक पुढे ढकलली गेली.

सहावेळा मिळाली होती स्थगिती

जिल्हा बँक निवडणुकीसाठी कुडाळच्या प्रांत वंदना खरमाळे यांची निवडणूक निर्णय अधिकारी म्हणून नियुक्ती झाली असून निवडणूक कार्यक्रम राज्य सहकार प्राधिकरणकडून मंजूर होऊन येताच प्रांत जिल्हा बँकेचा निवडणूक कार्यक्रम जाहीर करणार आहेत. त्यामुळे तब्बल सहा वेळा स्थगित झालेली जिल्हा बँकेचे निवडणूक बिगुल अखेर आता वाजणार आहे.

जिल्ह्यात आता निवडणुकीची धामधूम

जिल्ह्यात यापूर्वी कधीच नगरपालिका, ग्रामपंचायत, सहकारी संस्था व जिल्हा बँक यांच्या निवडणुका एकाचवेळी झाल्या नव्हत्या. मात्र, यावेळी त्या होत आहेत. ४ नगरपालिका, १३० ग्रामपंचायत पोटणीवडणुका, २१५ सहकारी विकास संस्था आणि जिल्हा बँक या संस्थांसाठी एकाचवेळी निवडणूक होत असल्याने जिल्ह्यात निवडणूक धामधूम मोठ्या प्रमाणात सुरू झाली आहे.