मालवण, (सिंधुदुर्ग) : मुसळधार पावसात मोहोर आणि फळांच्या उत्तम व्यवस्थापनातून संरक्षण करीत मालवण कुंभारमाठ येथील आंबा बागायतदार उत्तम सूर्यकांत फोंडेकर यांनी या हंगामातील पहिली देवगड हापूसची पेटी पुण्याला पाठविली आहे. पाच-पाच डझनच्या दोन पेट्यांची त्यांनी थेट विक्री प्रतिपेटी १८ हजार रुपयांना केली आहे. पहिली पेटी पाठविण्याचा मान त्यानी तिसऱ्यांदा मिळविला आहे.

आंब्याचा हंगाम सुरू होण्यासाठी अजूनही तीन ते चार महिन्यांचा कालावधी आहे; परंतु असे असले तरी यावर्षीच्या हंगामातील पहिली पेटी मालवण कुंभारमाठ येथून पुण्याला पाठविण्यात आली. गेल्या वर्षीच्या तुलनेत यावर्षी २० ते २५ दिवस अगोदरच पहिली पेटी बाजारपेठेत आली आहे.

जूनच्या अखेरीस आणि जुलैच्या पहिल्या आठवड्यात फोंडेकर यांच्या सहा ते सात झाडांना मोहोर आला होता. जुलैमध्ये जिल्ह्यात अतिवृष्टी होती. तरी देखील उत्तम व्यवस्थापनाच्या जोरावर त्यांनी मोहोर आणि फळांचे संरक्षण केले. गरजेनुसार विविध कीटकनाशक, बुरशीनाशकाच्या फवारण्या त्यांनी केल्या. ऑक्टोबरच्या दुसऱ्या आठवड्यानंतर आंबा परिपक्व होण्यास सुरुवात झाली. आज सकाळी साडेनऊला सहा झाडांवरील फळाची काढणी करण्यात आली. हा आंबा दोन पेट्यांमध्ये बंद करून पुणे येथील ग्राहकाला पाठविण्यात आला.

जूनच्या अखेरीस आणि जुलैच्या पहिल्या आठवड्यात काही झाडांना मोहोर आला होता. या मोहोराचे संरक्षण करण्यात आले. परिपक्व झालेल्या आंब्याची आज काढणी करून त्याची थेट विक्री करण्यात आली.आंबा व्यवस्थापनात फळसंशोधन केंद्र वेंगुर्ले आणि कृषी विभाग मालवणच्या अधिकाऱ्यांनी मार्गदर्शन केले.

- उत्तम फोंडेकर, आंबा बागायतदार, मालवण कुंभारमाठ