आचरा : शिक्षक मिळवण्यासाठी तोंडवळी-खालची ग्रामस्थांनी १७ जूनपासून मुलांना शाळेत न पाठविण्याचा घेतलेला निर्णय शिक्षण विभागाने शाळेला कामगिरी शिक्षक उपलब्ध करून दिल्याने तात्पुरता स्थगित करण्यात आला. मुलांना शाळेत पाठविल्याने तोंडवळी-खालची शाळा पुन्हा गजबजली; मात्र बदली प्रक्रियेत कायम स्वरूपी शिक्षक न मिळाल्यास पुन्हा मुलांना शाळेत न पाठविण्याचा इशारा लेखी निवेदनाद्वारे येथील पालकांनी शिक्षण विभागास दिला आहे.

जिल्हा परिषद प्राथमिक शाळा, तोंडवळी-खालची या शाळेला आवश्यक शिक्षक तातडीने न मिळाल्यास मुलांना शाळेत न पाठविण्याचा निर्णय तोंडवळी-तळाशिल ग्रामस्थांनी १७ जूनपासून घेतला होता. दरम्यान, गटशिक्षणाधिकारी कार्यालय, मालवण यांच्याकडून शाळेला कामगिरी शिक्षक उपलब्ध करून दिल्याचे शाळेला पत्र प्राप्त झाल्यावर येथील पालकांनी आपल्या मुलांना पुन्हा शाळेत पाठविण्याचा निर्णय घेतला; मात्र आता सुरू असलेल्या बदली प्रक्रियेत शाळेला कायमस्वरूपी शिक्षक मिळाला नाही तर पुन्हा मुलांना शाळेत पाठविणार नसल्याचा लेखी इशारा शाळेच्या मुख्याध्यापिका प्रज्ञा खडपकर यांना दिला आहे.

यावेळी शाळा व्यवस्थापन समिती अध्यक्ष जितेंद्र चोडणेकर, नंदकुमार कोचरेकर, स्नेहा कांदळगावकर, जान्हवी पराडकर, पल्लवी कोचरेकर, पुंडलिक मालंडकर, दिक्षा कोचरेकर, पुंडलिक मालंडकर, गुरुनाथ धुरी, सुरेंद्र मालंडकर आदी उपस्थित होते.