सावंतवाडी (सिंधुदुर्ग ) : ऐन दिवाळीच्या सणात खासगी केबलसाठी ठेकेदाराने रस्त्यात खोदाई करून अपघाताला आमंत्रण देण्याचे काम केले आहे. याकडे पालिका सत्ताधाऱ्यांचा पूर्णपणे दुर्लक्ष होत असल्याने याकडे सत्ताधाऱ्यांचे लक्ष वेधण्यासाठी सालईवाडा येथे खड्ड्यात मेणबत्या लावून अनोख्या प्रकारचे आंदोलन राष्ट्रवादी काँग्रेसकडून आज करण्यात आले. शिरोडा नाका परिसरात खड्डे बुजवण्याचे सुरू असलेले काम रोखत प्रथम रहदारीच्या ठिकाणचे रस्ते सुशिस्थित करा, अशी मागणी करण्यात आली.

हे आंदोलन राष्ट्रवादी काँग्रेस तालुकाध्यक्ष पुंडलिक दळवी यांच्या नेतृत्वाखाली करण्यात आले. यावेळी हिदायतुल्ला खान, इफ्तिकार राजगुरू, युवती जिल्हाध्यक्ष सावली पाटकर, संतोष जोईल, देवा टेमकर, बावतीस फर्नांडिस, असलम खतीब, दर्शना बाबर-देसाई, नझीर शेख, जहिरा ख्वाजा आदी उपस्थित होते.

यावेळी दळवी म्हणाले, "दिवाळीच्या सणातच जिओ लाईन टाकण्यासाठी शहरात सुस्थितीत असलेल्या रस्त्यांची खोदाई करण्यात आली. हे चर भरत असताना योग्य भराव न घातल्याने रस्त्यात खड्डे पडले असून हे खड्डे अपघाताला आमंत्रण देत आहेत. अनेक गाड्या या खड्यात अडकून अपघात झाले असून सर्वसमान्यांच्या गाड्यांचे नुकसान झाले आहे; मात्र याकडे लक्ष वेधूनही वारंवार पालिका प्रशासन याकडे दुर्लक्ष करत आहे." हे पालिका सत्ताधारी मोठा अनर्थ होण्याची वाट बघत आहेत काय? सत्ताधारी लोकांच्या भावनेशी खेळत असून राष्ट्रवादीकडून निषेध करण्यात आला तर सत्ताधारी आपल्याच मस्तीत असून ही मस्ती जीरावण्याचे काम नागरिकांनी योग्य वेळी करावे, असे आवाहनही दळवी यांनी केले. यानंतर शिरोडा नाका परिसरात खचलेला भराव दगड भरून सुस्थितीत करण्याचे सुरू असलेले काम रोखून प्रथम ज्या भागात जास्त रहदारी आहे, त्या भागातील काम प्रथम हाती घ्या, अशी मागणी करण्यात आली.